ഓഹരി വിപണിയിൽ ഉണർവ്

മുംബൈ∙ സർക്കാരുകൾ കോവിഡ് ആഘാതം മറികടക്കാൻ പല വിധ ഉത്തേജക പദ്ധതികളുമായി രംഗത്തുവരുമെന്ന പ്രതീക്ഷ മിക്ക രാജ്യങ്ങളിലും പടർന്നതോടെ ഓഹരിവിപണികൾ വൻ തകർച്ചയുടെ നാളുകൾക്കുശേഷം ഉണർന്നു. സർക്കാരിനും കമ്പനികൾക്കും ബാങ്കുകൾക്കുമൊക്കെ വൻതോതിൽ വായ്പ നൽകി മാന്ദ്യമകറ്റാൻ യുഎസ് കേന്ദ്ര ബാങ്ക് കഴിഞ്ഞ ദിവസം തീരുമാനിച്ചത് ലോകമാകെ വിപണിയെ സ്വാധീനിച്ചു. മറ്റു രാജ്യങ്ങളും ഈ പാത പിന്തുടരുമെന്ന കണക്കുകൂട്ടൽ ശക്തമാണ്. ഇന്ത്യ സാമ്പത്തിക സഹായ പാക്കജ് തയാറാക്കിക്കൊണ്ടിരിക്കുകയാണെന്ന് ധനമന്ത്രി അറിയിക്കുകയും ചെയ്തു.സെൻസെക്സ് 692.79 പോയിന്റും (2.67%) നിഫ്റ്റി 190.80 പോയിന്റും (2.51%) ഉയർന്നു. മിക്ക ഏഷ്യൻ, യൂറോപ്യൻ സൂചികകളും 6–8% ഉയർന്നു.രൂപയുടെ മൂല്യം 26 പൈസ ഉയർന്ന് ഡോളറിന് 75.94 രൂപ എന്ന നിലയിലെത്തി.