എംആർഎഫ്: ത്രൈമാസ ലാഭം 165 കോടി

ചെന്നൈ ∙  ടയർ ഉൽപാദന മേഖലയിലെ പ്രമുഖരായ എംആർഎഫിന്റെ നാലാം പാദത്തിൽ പ്രവർത്തന വരുമാനം  4,816.46 കോടി രൂപയിൽ നിന്ന് 5,304.82 കോടി രൂപയായി ഉയർന്നു. 2022 മാർച്ചിൽ അവസാനിച്ച നാലാം പാദത്തിൽ ലാഭം 165.21 കോടി രൂപയാണ്. മുൻ സാമ്പത്തിക വർഷം ഇതേ കാലയളവിൽ കമ്പനിയുടെ ലാഭം 332.15 കോടി രൂപയായിരുന്നു. അസംസ്കൃത വസ്തുക്കളുടെ വിലയിലുണ്ടായ വർധന ലാഭത്തെ ബാധിച്ചതായി കമ്പനി വ്യക്തമാക്കി. ഓഹരി ഒന്നിന് 144 രൂപ അന്തിമ ലാഭവിഹിതം ശുപാർശ ചെയ്തിട്ടുണ്ട്. 2022 മാർച്ചിൽ അവസാനിച്ച സാമ്പത്തിക വർഷത്തിലെ നാലു പാദങ്ങളിലുമായി കമ്പനിക്ക് മൊത്തം 19304.43 കോടി രൂപയുടെ വരുമാനമുണ്ടായി. കഴിഞ്ഞ സാമ്പത്തിക വർഷം 16128.58 കോടിയായിരുന്നു വരുമാനം.