‘വി’ ഓഹരി സർക്കാരിന് നൽകാൻ സെബി അംഗീകാരം
Mail This Article
ന്യൂഡൽഹി∙ ടെലികോം കമ്പനിയായ വോഡഫോൺ–ഐഡിയയുടെ (വി) 33% ഓഹരി കേന്ദ്രസർക്കാർ ഏറ്റെടുക്കാനുള്ള നീക്കത്തിന് ഓഹരി വിപണി നിയന്ത്രണ ഏജൻസിയായ സെബിയുടെ പച്ചക്കൊടി. 25 ശതമാനത്തിനു മുകളിൽ ഓഹരി ഏറ്റെടുക്കുമ്പോൾ കമ്പനിയുടെ നിലവിലെ ഓഹരിഉടമകൾക്ക് 'ഓപ്പൺ ഓഫർ' നൽകണമെന്ന വ്യവസ്ഥ സെബി ഇളവു ചെയ്തു നൽകി. നിലവിലെ ഓഹരി ഉടമകൾക്ക് ലാഭമുണ്ടാക്കി പുറത്തേക്ക് (എക്സിറ്റ്) പോകാൻ അവസരം നൽകുകയാണ് ഓപ്പൺ ഓഫറിന്റെ പ്രധാന ലക്ഷ്യം. വിയുടെ ഓഹരികൈമാറ്റം പൊതുതാൽപര്യം സംരക്ഷിക്കാനുള്ള നീക്കമെന്ന് വിലയിരുത്തിയാണ് സെബി ഇളവ് നൽകിയത്.
സർക്കാരിന് വിയുടെ മാനേജ്മെന്റിന്റെ ഭാഗമാകാൻ താൽപര്യമില്ലാത്തുകൊണ്ട് നിലവിലെ ഭരണസംവിധാനത്തിൽ മാറ്റം വരില്ല.സ്പെക്ട്രം നിരക്ക്, അഡ്ജസ്റ്റഡ് ഗ്രോസ് റവന്യു (എജിആർ) ഇനങ്ങളിൽ കേന്ദ്രത്തിനു നൽകാനുള്ള തുകയുടെ പലിശയുടെ മൂല്യത്തിനുള്ള ഓഹരികളാണു കമ്പനി കൈമാറുന്നത്. കൈമാറ്റം പൂർത്തിയാകുമ്പോൾ കമ്പനിയിലെ ഏറ്റവും വലിയ ഓഹരി ഉടമയായി കേന്ദ്രസർക്കാർ മാറും.
