സർക്കാരിന്റെ ഇ–കൊമേഴ്സിന്റെ ഭാഗമായി സ്നാപ്ഡീൽ

ന്യൂഡൽഹി∙ ഓൺലൈൻ വ്യാപാര കമ്പനിയായ സ്നാപ്ഡീൽ കേന്ദ്രസർക്കാർ പിന്തുണയോടെയുള്ള വികേന്ദ്രീകൃത ഇ–കൊമേഴ്സ് ശൃംഖലയായ ഓപ്പൺ നെറ്റ്‍വർക്ക് ഫോർ ഡിജിറ്റൾ കൊമേഴ്‌സിന്റെയും (ഒഎൻഡിസി) ഭാഗമാകുന്നു. ഒരു ഇ–കൊമേഴ്സ് പ്ലാറ്റ്ഫോം ഔദ്യോഗികമായി സർക്കാർ ശൃംഖലയുടെ കൂടി ഭാഗമാകുന്നത് ആദ്യമാണ്. ആമസോൺ അടക്കമുള്ള പ്ലാറ്റ്ഫോമുകളും ഒഎൻഡിസിയുടെ ഭാഗമാകാൻ ചർച്ച നടത്തുന്നുവെന്ന് റിപ്പോർട്ടുകളുണ്ടായിരുന്നു. 

ഓഗസ്റ്റ് പകുതിയോടെ 2,500 നഗരങ്ങളിൽ സ്നാപ്ഡീലിന്റെ പിന്തുണയോടെ ഒഎൻഡിസി എത്തും. പേയ്മെന്റ് രംഗത്ത് യുപിഐ (യുണിഫൈഡ് പേയ്മെന്റ്സ് ഇന്റർഫേസ്) പോലൊരു സംവിധാനമാണ് ഇ– കൊമേഴ്സ് മേഖലയിൽ ഒഎൻഡിസി. അതായത് ഗൂഗിൾ പേ, പേയ്ടിഎം, ഭീം, ഫോൺപേ എന്നിങ്ങനെ വ്യത്യാസമില്ലാതെ യുപിഐ വഴി പേയ്മെന്റ് നടത്താമെന്നതു പോലെ പ്ലാറ്റ്ഫോം കേന്ദ്രീകൃതമല്ലാതെ ഉൽപന്നങ്ങൾ വാങ്ങുന്നവരെയും വിൽക്കുന്നവരെയും ബന്ധിപ്പിക്കുകയാണ് ലക്ഷ്യം.