മുംബൈ∙ തുടർച്ചയായ നാലാം വ്യാപാര ദിനവും ഓഹരി വിപണി മുന്നേറിയതോടെ സൂചികകൾ മൂന്നുമാസത്തിനിടയിലെ ഉയർന്ന നിലയിലെത്തി. സെൻസെക്സ് 58000 പോയിന്റ് തിരിച്ചുപിടിച്ചു. റിലയൻസ് ഇൻഡസ്ട്രീസ്, ഓട്ടോ ഓഹരികൾ കരുത്തുകാണിച്ചതു നേട്ടമായി. ഡോളറിനെതിരെ രൂപ മെച്ചപ്പെടുന്നതും നിക്ഷേപകർക്ക് ആത്മവിശ്വാസം നൽകി. സെൻസെക്സ് 545.25 പോയിന്റ് ഉയർന്ന് 58,115.50ലാണ് വ്യാപാരം അവസാനിപ്പിച്ചത്. ഏപ്രിൽ 13 ന് ശേഷം 58000ൽ എത്തുന്നത് ആദ്യം. നിഫ്റ്റി 181.80 പോയിന്റ് കൂടി 17,340.05ലും ക്ലോസ് ചെയ്തു.  ഡോളറുമായുള്ള വിനിമയത്തിൽ രൂപ ഇന്നലെ 22 പൈസ നേട്ടത്തോടെ 79.02 നിലവാരത്തിലെത്തി. ക്രൂഡ് ഓയിൽ വില കുറയുന്നത് ആശ്വാസമായി.