മലയാളി സ്റ്റാർട്ടപ്പിൽ ഫ്ലിപ്കാർട് നിക്ഷേപം

ന്യൂഡൽഹി∙ മലയാളി സ്റ്റാർട്ടപ്പായ 'സെല്ലർആപ്പി'ൽ ഫ്ലിപ്കാർട്ടിന്റെ നിക്ഷേപക വിഭാഗമായ ഫ്ലിപ്കാർട് വെഞ്ചേഴ്സ് ഏകദേശം 4 കോടി രൂപയുടെ (5 ലക്ഷം ഡോളർ) നിക്ഷേപം നടത്തി. രാജ്യമാകെ 6 സ്റ്റാർട്ടപ്പുകളിലാണ് ഫ്ലിപ്കാർട് നിക്ഷേപം നടത്തിയത്. ഫ്ലിപ്കാർട്ടിനു പുറമേ കോൺഗ്ലോ വെഞ്ചേഴ്സ് അടക്കമുള്ള നിക്ഷേപ സ്ഥാപനങ്ങളിൽ നിന്നുള്ള തുക കൂടി കണക്കാക്കിയാൽ ഏകദേശം 15 കോടിയോളം രൂപയാണ് ഈ റൗണ്ടിൽ ബെംഗളൂരു ആസ്ഥാനമായ സെല്ലർആപ്പിനു ലഭിച്ചത്. ഹരിപ്പാട് സ്വദേശിയായ ദിലീപ് വാമനനാണ് കമ്പനിയുടെ സ്ഥാപകൻ. ഇ–കൊമേഴ്സ് ശൃംഖലകളിൽ സാധനങ്ങൾ വിൽക്കാൻ ആഗ്രഹിക്കുന്ന സെല്ലർമാർക്ക് ഡേറ്റ അധിഷ്ഠിതമായ പിന്തുണ നൽകുന്ന സ്ഥാപനമാണ് 2017ൽ ആരംഭിച്ച സെല്ലർആപ്പ്.