വൻ നിക്ഷേപങ്ങൾക്ക് പലിശ കൂട്ടി എസ്ബിഐ

കൊച്ചി∙ 10 കോടി രൂപയ്ക്കു താഴെയുള്ള സേവിങ്സ് ബാങ്ക് നിക്ഷേപങ്ങളുടെ പലിശ നിരക്ക് 0.05% കുറച്ച് 2.70% ആക്കിയതിനു പിന്നാലെ സ്റ്റേറ്റ് ബാങ്ക് ഓഫ് ഇന്ത്യ (എസ്ബിഐ) 10 കോടിയും അതിന് മുകളിലും ഉള്ള സേവിങ്സ് ബാങ്ക് നിക്ഷേപങ്ങളുടെ പലിശ നിരക്ക് 0.30% വർധിപ്പിച്ച് 3% ആക്കി. പുതിയ നിരക്കുകൾ പ്രാബല്യത്തിലായി.

നിക്ഷേപ വളർച്ച കുറയുകയും വായ്പവിതരണം കൂടുകയും ചെയ്യുന്ന സാഹചര്യം നേരിടാനാണ് വൻകിട നിക്ഷേപങ്ങൾക്ക് അനുകൂലമായ പലിശനിരക്കു പരിഷ്കരണം. കൂടുതൽ ഉപഭോക്തൃ വായ്പകളുടെയും അടിസ്ഥാനമായ മാർജിനൽ കോസ്റ്റ് ഓഫ് ഫണ്ട്സ് അധിഷ്ഠിത പലിശ നിരക്ക് (എംസിഎൽആർ) 0.25% ഉയർത്തി 7.95% ആക്കിയിട്ടുണ്ട്. അത്തരം വായ്പകളുടെയെല്ലാം തിരിച്ചടവുഭാരം ഇതനുസരിച്ച് ഉയരും.