കശുവണ്ടി വ്യവസായ പ്രതിസന്ധി: പഠനസമിതിയെ നിയോഗിച്ച് സർക്കാർ

കൊല്ലം ∙ കശുവണ്ടി വ്യവസായ മേഖലയുടെ പ്രശ്നങ്ങളും പ്രതിസന്ധിയും പഠിച്ചു പരിഹാര നിർദേശങ്ങൾ സമർപ്പിക്കുന്നതിന് സംസ്ഥാന സർക്കാർ 5 അംഗ വിദഗ്ധ സമിതി  രൂപീകരിച്ചു. കോഴിക്കോട് ഐഐഎം സ്ട്രാറ്റജിക് മാനേജ്മെന്റ് അസോഷ്യേറ്റ് പ്രഫസർ ഡോ.എസ്. വെങ്കിട്ടരാമൻ, സംസ്ഥാന ആസൂത്രണ ബോർഡ് ഇൻഡസ്ട്രി ആൻഡ് ഇൻഫ്രാസ്ട്രക്ചർ ഡിവിഷൻ മുൻ മേധാവി എൻ. ആർ. ജോയി. സെന്റർ ഫോർ സോഷ്യൽ – ഇക്കണോമിക് ആൻഡ് എൻവയൺമെന്റ് സ്റ്റഡീസ് ഡയറക്ടർ ഡോ.എൻ.അജിത്കുമാർ, കശുവണ്ടി വികസന കോർപറേഷൻ ചെയർമാൻ എസ്.ജയമോഹൻ, കേരള കാഷ്യു ബോർഡ് ലിമിറ്റഡ് ചെയർമാനും എംഡിയുമായ എ.അലക്സാണ്ടർ എന്നിവരാണു സമിതിയിൽ.

സംസ്ഥാനത്തെ കശുവണ്ടി മേഖലയും സ്വകാര്യ കശുവണ്ടി വ്യവസായവും  നേരിടുന്ന പ്രശ്നങ്ങൾ പഠിച്ചു സമഗ്രവികസനം ഉറപ്പാക്കുന്നതിന് ആവശ്യമായ പദ്ധതികൾക്കുള്ള നിർദേശങ്ങളാണു  സമർപ്പിക്കേണ്ടത്.