സ്വർണവില പുതിയ ഉയരത്തിൽ; പവന് 42880
Mail This Article
കണ്ണൂർ∙ സംസ്ഥാനത്ത് സ്വർണവില വീണ്ടും റെക്കോർഡ് ഉയരത്തിലെത്തി. ഇന്നലെ പവന് 480 രൂപ ഉയർന്നതോടെ വില 42880 രൂപയായി. അമേരിക്കൻ കേന്ദ്രബാങ്കായ ഫെഡറൽ റിസർവ് പലിശ നിരക്കുകൾ കാൽ ശതമാനം കൂടി ഉയർത്തിയതോടെ രാജ്യാന്തര വിപണിയിൽ വില ഉയർന്നതാണ് സ്വർണ വില ഉയരാൻ കാരണം. രാജ്യാന്തര വിപണിയിൽ ട്രോയ് ഔൺസിന്റെ വില 1950 ഡോളർ പിന്നിട്ടു. രാജ്യാന്തര വിപണിയിൽ 2022 ഏപ്രിലിനു ശേഷമുള്ള ഏറ്റവും ഉയർന്ന നിരക്കാണിത്.
സുരക്ഷിത നിക്ഷേപമെന്ന ചിന്തയിൽ സ്വർണം വാങ്ങുന്ന വൻകിട നിക്ഷേപകരുടെ എണ്ണം കൂടിയതാണ് രാജ്യാന്തര വിപണിയിൽ ഡിമാൻഡ് ഉയരാൻ കാരണം. കമ്മോഡിറ്റി എക്സ്ചേഞ്ചിൽ 10 ഗ്രാം സ്വർണത്തിന്റെ വിലയും പുതിയ റെക്കോർഡിലെത്തി. 58826 രൂപയാണ് ഇന്നലത്തെ വില. കഴിഞ്ഞ ദിവസം ബജറ്റിൽ ഇറക്കുമതിചെയ്ത ആഭരണങ്ങളുടെ നികുതി മൂന്നു ശതമാനമുയർത്തിയതിനെത്തുടർന്ന് വില ഉയർന്നിരുന്നു. ഇതോടെ സംസ്ഥാനത്ത് 5 ശതമാനം പണിക്കൂലിയുള്ള ഒരു പവൻ സ്വർണാഭരണം വാങ്ങാൻ 46500 രൂപയോളം നൽകണം.