വീണ്ടും കുറഞ്ഞ് വിദേശ നാണ്യ കരുതൽ ശേഖരം

മുംബൈ∙ തുടർച്ചയായ നാലാം വാരവും വിദേശ നാണ്യ കരുതൽ ശേഖരത്തിൽ ഇടിവ്. ഫെബ്രുവരി 24ന് അവസാനിച്ച ആഴ്ച്ചയിൽ ശേഖരം 32.5 കോടി ഡോളർ താഴ്ന്ന് 56094.2 കോടി ഡോളറിലെത്തി. മുൻ അവലോകന വാരത്തിൽ ശേഖരത്തിലുണ്ടായ ഇടിവ് 56.8 കോടി ഡോളറിന്റേതായിരുന്നു. 2021 ഒക്ടോബറിൽ 64500 കോടി ഡോളർ എന്ന റെക്കോർഡ് നിലവാരത്തിൽ ശേഖരം എത്തിയിരുന്നു. ഡോളറുമായുള്ള വിനിമയത്തിൽ രൂപയെ ഇടിവിൽ നിന്ന് രക്ഷിക്കാൻ നല്ല തോതിൽ ഡോളർ വിറ്റഴിക്കേണ്ടി വന്നതാണ് കരുതൽ ശേഖരം കുറയാൻ കാരണമായി പറയുന്നത്. സ്വർണത്തിന്റെ ശേഖരം 6.6 കോടി ഡോളർ കുറഞ്ഞ് 4175.1 കോടി ഡോളറിലെത്തി.