ജിഡിപി വളർച്ചാ നിരക്ക് 7.2%; കുതിപ്പ്

ന്യൂഡൽഹി‌​∙ റിസർവ് ബാങ്കിന്റെയടക്കം അനുമാനങ്ങളെ‌‌ മറികടന്ന് ഇന്ത്യയുടെ സാമ്പത്തിക വളർച്ചാനിരക്കിൽ കുതിപ്പ്. ഇക്കഴിഞ്ഞ സാമ്പത്തികവർഷത്തിന്റെ നാലാം പാദത്തിൽ( ജനുവരി–മാർച്ച്) വളർച്ചാനിരക്ക് 6.1% ആ‌യി. കഴിഞ്ഞ വർഷത്തെ ആകെ ജിഡിപി വളർച്ചാനിരക്ക് ഇതോടെ 7.2% ആ‌‌യി. 7% കൈവരിക്കുമെന്നായിരുന്നു കേന്ദ്ര സ്റ്റാറ്റിസ്റ്റിക്കൽ മന്ത്രാലയത്തിന്റെയും റിസർവ് ബാങ്കിന്റെ‌യും അനുമാനം. 2021–22ലെ വളർച്ചാനിരക്ക് 9.1% ആയിരുന്നു.

ജനുവരി–മാർച്ച് കാലയളവിലെ വളർച്ചാനിരക്ക് 4.1 ശതമാനത്തിനും 5.7നും ഇ‌ട‌യിലാ‌യിരിക്കുമെന്ന പ്രവചനങ്ങളെ മറിക‌ടന്നാണ് വളർച്ച 6.1 ശതമാനത്തിലെത്തിയത്. ‍‍ 5.1% ആയിരുന്നു ആർബിഐയുടെ പ്രവചനം. സ്റ്റേറ്റ് ബാങ്ക് ഓഫ് ഇന്ത്യ റിസർച്ചിന്റേത് 5.5 ശതമാനവും. ചൈനയുടെ ഇതേ കാലയളവിലെ വളർച്ചാനിരക്ക് 4.5% മാത്രമാണ്. മുൻ സാമ്പത്തികവർഷം ഇതേ കാലയളവിൽ ഇന്ത്യയുടെ നിരക്ക് 4% ആയിരുന്നു. ഇക്കഴിഞ്ഞ ഒക്ടോബർ–ഡിസംബർ കാലയളവിൽ വളർച്ചാനിരക്ക് 4.5 ശതമാനവും.

കരകയറി ഉൽപാദന മേഖല

കൃഷി അ‌ടക്കമുള്ള മിക്ക മേഖലകളും മികച്ച വളർച്ചാനിരക്കു രേഖപ്പെടുത്തിയപ്പോഴ​ും തകർച്ചയിലായിരുന്നത് ഉൽപാദനമേഖലയാ‌ണ്. മൂന്നാം പാദത്തിൽ 1.4% ഇടിവ് രേഖപ്പെ‌ടുത്തിയ ഉൽപാദനമേ‌ഖല ഇത്തവണ ഭേദപ്പെ‌ട്ട തിരിച്ചുവരവാണ് നടത്തിയത്. നാലാം പാദത്തിൽ 4.5%  വളർച്ച രേഖപ്പെടുത്തി. എന്നാൽ സാമ്പത്തികവർഷമാകെയുള്ള പ്രകടനം കണക്കാക്കി‌യാൽ മുൻ വർഷത്തെ അപേക്ഷിച്ച് (11.1%) ഇത്തവണത്തെ നിരക്ക് 1.3% മാത്രമാണ്. മൂന്നാം പാദത്തിൽ കാർഷിക മേഖലയുടെ വ​ളർച്ച 3.7 ശതമാനമായിരുന്നത് ഇത്തവണ 5.5% ആയി ഉയർന്നു. കെട്ടിടനിർമാണരംഗത്തും ഉണർവുണ്ടായി. 8.3% എന്ന നിരക്ക് 10.4 ആയി ഉയർന്നു. ഖനനം, റി‌‌യൽ എസ്റ്റേറ്റ്, ധനകാര്യ സേവനങ്ങൾ എന്നിവ‌‌‌‌യിലും മെച്ചപ്പെട്ട വളർച്ച രേഖപ്പെടുത്തി.

ധനക്കമ്മി 6.4%; ലക്ഷ്യം കൈവരിച്ചു

2022–23 സാമ്പത്തികവർഷം രാജ്യത്തെ ധനക്കമ്മി മൊത്തം ആഭ്യന്തര ​ഉൽപാദനത്തിന്റെ 6.4 ശതമാനത്തിലൊതുങ്ങി. സർക്കാർ ലക്ഷ്യംവച്ച അതേ തോതിലാണ്. മുൻവർഷത്തെ 6.7 ശതമാനത്തിൽ നിന്ന് 6.4 ആക്കി ധനക്കമ്മി ചുരുക്കാനാണ് കേന്ദ്രം പരിശ്രമിക്കുന്നതെന്ന് ബജറ്റിൽ  വ്യക്തമാക്കിയിരുന്നു. 17.33 ലക്ഷം കോടി രൂപയാണ് ധനക്കമ്മി. 2025–26ൽ ധനക്കമ്മി 4.5% ആയി കുറയ്ക്കുകയാണ് ലക്ഷ്യം. നടപ്പുസാമ്പത്തികവർഷം 5.9 ശതമാനമാണ് ലക്ഷ്യം.സർക്കാരിന്റെ മൊത്ത ചെലവും വായ്‌പ ഒഴികെയുള്ള മൊത്ത വരുമാനവും തമ്മിലുള്ള അന്തരമാണ് ധനക്കമ്മി. 

ജിഡിപി വളർച്ച ഇങ്ങനെ
(ഉൽപന്നങ്ങളും സേവനങ്ങളുമടക്കം രാജ്യത്തെ മൊത്തം സാമ്പത്തികപ്രവർത്തനങ്ങളുടെ ആകെ മൂല്യമാണ് ജിഡിപി)

2022–23: 160.06 ലക്ഷം കോ‌ടി രൂപ‌
2021–23: 149.26 ലക്ഷം കോടി രൂപ
2020–21: 136.87 ലക്ഷം കോടി രൂപ

Content Highlight: India GDP Q4 Growth