ബിഎസ്പി, എസ്പി മധ്യപ്രദേശ് മന്ത്രിസഭയിലേക്കെന്നു സൂചന
Mail This Article
ഭോപാൽ ∙ ബഹുജൻ സമാജ് പാർട്ടി, സമാജ്വാദി പാർട്ടി എന്നിവയ്ക്കു കൂടി മന്ത്രിസഭയിൽ പ്രാതിനിധ്യം നൽകിക്കൊണ്ട് മധ്യപ്രദേശ് മന്ത്രിസഭ ബജറ്റ് സമ്മേളനത്തിനു ശേഷം അഴിച്ചുപണിയുമെന്നു സൂചന.
ഒന്നോ രണ്ടോ സ്വതന്ത്ര അംഗങ്ങളെക്കൂടി മന്ത്രിമാരാക്കിയേക്കും. സ്വതന്ത്രനായി ജയിച്ച പ്രദീപ് ജയ്സ്വാൾ ഇപ്പോൾത്തന്നെ മന്ത്രിയാണ്.
ജൂലൈ 8 മുതൽ 26 വരെയാണ് ബജറ്റ് സമ്മേളനം. ഇതിനുശേഷം മാത്രമേ മന്ത്രിസഭാ അഴിച്ചുപണി ഉണ്ടാകുകയുള്ളുവെന്ന് കോൺഗ്രസിന്റെ മീഡിയ സെല്ലിന്റെ ചുമതലയുള്ള ശോഭ ഓജ പറഞ്ഞു. ബഹുജൻ സമാജ് പാർട്ടിക്ക് (ബിഎസ്പി) 2 എംഎൽഎമാരാണുള്ളത്; സമാജ്വാദി പാർട്ടിക്ക് (എസ്പി) ഒരാളും.
ലോക്സഭാ തിരഞ്ഞെടുപ്പിൽ മധ്യപ്രദേശിലെ ഭരണകക്ഷിയായ കോൺഗ്രസ് പാർട്ടിക്കു വൻ തോൽവി ഉണ്ടായപ്പോൾ തന്നെ മന്ത്രിസഭാ വികസനത്തെപ്പറ്റി കിംവദന്തികളുണ്ടായിരുന്നു.
15 വർഷത്തിനു ശേഷം 2018 ഡിസംബറിൽ മധ്യപ്രദേശിൽ അധികാരത്തിൽ വന്ന കോൺഗ്രസിന് നിയമസഭയിൽ കേവല ഭൂരിപക്ഷമുണ്ടായിരുന്നില്ല.
തുടർന്നു 4 സ്വതന്ത്രന്മാർ, 2 ബിഎസ്പി, ഒരു എസ്പി എംഎൽഎമാർ എന്നിവർ പിന്തുണ നൽകി. ഈ സാഹചര്യത്തിലാണ് ഇവരെക്കൂടി മന്ത്രിസഭയിലെടുത്തു സർക്കാരിന്റെ അടിത്തറ ശക്തിപ്പെടുത്താനുള്ള ശ്രമം.