ശ്രീരാമന്റെ 232–ാം പിൻമുറക്കാരെന്ന അവകാശവാദവുമായി മേവാഡ് രാജകുടുംബം

ജയ്പുർ ∙ ബിജെപി എംപി ദിയാകുമാരിക്കു പിന്നാലെ ശ്രീരാമന്റെ പാരമ്പര്യം അവകാശപ്പെട്ടു മേവാഡ് രാജകുടുംബാംഗമായ അരവിന്ദ് സിങ്ങും രംഗത്തെത്തി. രാമന്റെ പിൻമുറക്കാർ ആരെങ്കിലും ജീവിച്ചിരിപ്പുണ്ടോ എന്ന സുപ്രീം കോടതിയുടെ പരാമർശമാണ് ഈ അവകാശ വാദങ്ങൾക്കു തിരികൊളുത്തിയത്. 

രഘുവംശജരാണ് തങ്ങളെന്നും രാമന്റെ നേരിട്ടുള്ള പിന്തുടർച്ചയിൽ 232–ാം തലമുറയിൽപ്പെട്ടവർ ആണെന്നുമാണു സിങ്ങിന്റെ വാദം. അതേസമയം നിരവധി രജപുത്രന്മാരും ഇതേ അവകാശവുമായി രംഗത്തെത്തി.

കോൺഗ്രസ് സംസ്ഥാന വക്താവും മുൻ ഉപരാഷ്ട്രപതി ഭൈറോൺ സിങ് ശെഖാവത്തിന്റെ ബന്ധുവുമായ സത്യേന്ദ്ര രാഘവാണ് അതിൽ പ്രമുഖൻ.