രോഗികളുടെ എണ്ണത്തിൽ ഇന്ത്യ ഒമ്പതാമത്; കേരളത്തിൽ ദേശീയ ശരാശരിയേക്കാൾ വേഗം

ന്യൂഡൽഹി ∙ കോവിഡ് രോഗികളുടെ എണ്ണത്തിൽ ഇന്ത്യ തുർക്കിയെയും മറികടന്ന് ലോകത്ത് ഒൻപതാം സ്ഥാനത്ത്. സംസ്ഥാനങ്ങൾ സ്ഥിരീകരിച്ച കണക്കുപ്രകാരം ഇന്ത്യയിൽ രോഗികൾ 1,63,732 ആയി. തുർക്കിയിൽ 1,59,797. രാജ്യത്തു മൊത്തം മരണം 4655 ആയി. രോഗികളുടെ എണ്ണത്തിൽ ഇന്ത്യയ്ക്കു തൊട്ടുമുന്നിൽ ഇപ്പോൾ ജർമനിയാണ് – 1,82,150 പേർ. 

ഒരാഴ്ചയ്ക്കിടെ അരലക്ഷത്തിനടുത്ത് രോഗികൾ

പ്രതിദിന കോവിഡ‍് പരിശോധന ശരാശരി ഒരു ലക്ഷമായി ഉയർത്തിയതിനു പിന്നാലെ, രാജ്യത്തു രോഗികളുടെ എണ്ണം കുതിച്ചുയരുന്നു. ഒരാഴ്ചയ്ക്കിടെ രാജ്യത്തു റിപ്പോർട്ട് ചെയ്തത് 46,574 കോവിഡ് കേസുകൾ. 7 ദിവസത്തിനിടെ 1096 പേർക്കാണ് ജീവൻ നഷ്ടമായത്. മേയ് 13 മുതൽ തുടർച്ചയായി 100ലധികം പേരാണു പ്രതിദിനം മരിക്കുന്നത്. 20നു ശേഷം രോഗികളുടെ എണ്ണം പ്രതിദിനം അയ്യായിരത്തിലധികമാണ്.  ‌‌

ഏപ്രിൽ 14 മുതൽ മേയ് 27 വരെയുള്ള കണക്കിൽ കോവിഡ് പരിശോധന പ്രതിദിനം 5.9% എന്ന നിരക്കിൽ വർധിച്ചപ്പോൾ രോഗികളുടെ എണ്ണം ദിവസേന 6.4% എന്ന നിരക്കിലാണ് കൂടുന്നത്. 

ദേശീയ ശരാശരിയെക്കാൾ വേഗം

കേരളത്തിൽ കോവിഡ് രോഗികളുടെ എണ്ണത്തിലെ വർധന ദേശീയ ശരാശരിയെക്കാൾ വേഗത്തിൽ. കേരളത്തിൽ രോഗികളുടെ എണ്ണത്തിലെ വർധനയുടെ തോത് 8.67%. ദേശീയ ശരാശരി 4.14%. കേരളത്തിൽ രോഗികളുടെ എണ്ണം ഇരട്ടിക്കാൻ ഇപ്പോൾ 12ൽ താഴെ ദിവസം മതി. ദേശീയതലത്തിൽ ഇതു 14 ദിവസമാണ്. അതേസമയം, കേരളത്തിൽ കോവിഡ്  മരണനിരക്ക് 0.5 % മാത്രമാണെന്നും ദേശീയ നിരക്ക് 2.89 % ആണെന്നും മുഖ്യമന്ത്രി ചൂണ്ടിക്കാട്ടി. 

ട്രെയിൻ അഡ്വാൻസ് റിസർവേഷൻ 120 ദിവസം മുൻപേ

റെയിൽവേ ഓടിക്കുന്ന സ്പെഷൽ എസി ട്രെയിനുകളുടെയും ജൂൺ 1 മുതൽ ഓടിക്കുന്ന ട്രെയിനുകളുടെയും അഡ്വാൻസ് റിസർവേഷൻ 120 ദിവസം മുൻപേ ചെയ്യാം. 30 ദിവസം മുൻപു വരെയായിരുന്നു ഇതുവരെ അനുവദിച്ചിരുന്നത്.

ലോക്ഡൗൺ  ഇനി: മറ്റന്നാൾ അറിയാം

പ്രധാനമന്ത്രി നരേന്ദ്ര മോദി മറ്റന്നാൾ ‘മൻ കി ബാത്തി’ൽ ലോക്ഡൗണിന്റെ അടുത്ത ഘട്ടത്തെക്കുറിച്ചു വിശദീകരിക്കും. ലോക്ഡൗൺ നാലാം ഘട്ടം തീരുന്നത് അന്നാണ്. 

English Summary: Covid Patients:India At No. 9 On Global Coronavirus Chart