സിനിമയ്ക്ക്‘റിലീസ് ’:15 മുതൽ തിയറ്ററുകൾ തുറക്കാം; പാതി സീറ്റുകൾ ഒഴിച്ചിടണം
Mail This Article
ന്യൂഡൽഹി ∙ തിയറ്ററുകൾക്കും മൾട്ടിപ്ലക്സുകൾക്കും ഈ മാസം 15 മുതൽ ലോക്ഡൗണിൽ നിന്നു ‘റിലീസ്.’ ഇവ ഉപാധികളോടെ തുറക്കാമെന്ന് കേന്ദ്ര ആഭ്യന്തര മന്ത്രാലയത്തിന്റെ അൺലോക്ക് 5 മാർഗരേഖ വ്യക്തമാക്കി. അൺലോക്ക് എന്നതിനു പകരം ‘റീ ഓപ്പണിങ്’ എന്ന പേരിലാണ് ഇക്കുറി മാർഗനിർദേശങ്ങൾ ഇറക്കിയിരിക്കുന്നത്. കണ്ടെയ്ൻമെന്റ് സോണുകളിൽ ഈ മാസം 31 വരെ കർശന ലോക്ഡൗൺ തുടരും. സ്കൂളുകൾ തുറക്കുന്നതു സംബന്ധിച്ച് സംസ്ഥാനങ്ങൾക്കു തീരുമാനമെടുക്കാമെന്നും മാർഗരേഖ വ്യക്തമാക്കി.
മാർഗനിർദേശങ്ങൾ:
∙ കായിക താരങ്ങൾക്കു പരിശീലനത്തിനായി നീന്തൽക്കുളങ്ങൾ ഉപയോഗിക്കാം.
∙ വിദ്യാർഥികൾ പാലിക്കേണ്ട മാർഗനിർദേശങ്ങൾ സംസ്ഥാന വിദ്യാഭ്യാസ വകുപ്പ് തയാറാക്കണം. വിദ്യാർഥിക്കു സ്കൂളിലെത്താൻ രക്ഷിതാവിന്റെ രേഖാമൂലമുള്ള സമ്മതം ആവശ്യം.
∙ ഓൺലൈൻ പഠനം തുടരാൻ ആഗ്രഹിക്കുന്ന വിദ്യാർഥികളെ അനുവദിക്കണം. ഹാജർ നിർബന്ധമാക്കരുത്.
∙ പിഎച്ച്ഡി, പിജി വിദ്യാർഥികൾക്ക് പഠനാവശ്യത്തിന് 15 മുതൽ കോളജ് ലബോറട്ടറികൾ തുറന്നു കൊടുക്കാം.
∙ സാമൂഹിക, അക്കാദമിക, കായിക, വിനോദ, സാംസ്കാരിക, മത, രാഷ്ട്രീയ ചടങ്ങുകളിൽ 100നു മുകളിൽ ആളുകൾക്കു പങ്കെടുക്കാം. മാസ്ക്, അകല വ്യവസ്ഥ, തെർമൽ സ്കാനിങ്, സാനിറ്റൈസർ എന്നിവ നിർബന്ധം.
∙ ഹാളുകളിലാണ് ചടങ്ങെങ്കിൽ പരമാവധി പങ്കെടുക്കാവുന്നത് 200 പേർക്ക്. ഇരിപ്പിടത്തിന്റെ പകുതി ഒഴിച്ചിടണം.
∙ തുറസ്സായ സ്ഥലങ്ങളിലുള്ള ഒത്തുചേരലുകളിൽ അകല വ്യവസ്ഥ അടക്കമുള്ള നിബന്ധനകൾ കർശനമായി പാലിക്കണം.
∙ ഉന്നത വിദ്യാഭ്യാസ സ്ഥാപനങ്ങൾ തുറക്കുന്നത് സംബന്ധിച്ച് ആഭ്യന്തര മന്ത്രാലയവുമായി ചർച്ച നടത്തി വിദ്യാഭ്യാസ മന്ത്രാലയം അന്തിമ തീരുമാനമെടുക്കണം.
∙ പാർക്കുകൾ തുറക്കാം.
∙ കണ്ടെയ്ൻമെന്റ് സോണുകൾക്കു പുറത്ത് സംസ്ഥാനങ്ങൾ ലോക്ഡൗൺ ഏർപ്പെടുത്തരുത്.
∙ സംസ്ഥാനങ്ങൾക്കുള്ളിലും പുറത്തേക്കും യാത്രാ വിലക്കില്ല. ഇതിന് പ്രത്യേക പാസ്, പെർമിറ്റ് എന്നിവ ആവശ്യമില്ല.
English summary: Unlock: Theaters to open