ഓഹരി ഇടപാടിലെ ക്രമക്കേട്: പ്രണോയ് റോയ് ഉൾപ്പെടെ ഏഴ് പേർക്കു വിലക്ക്

ന്യൂഡൽഹി ∙ ഓഹരി ഇടപാടിലെ ക്രമക്കേടിന്റെ പേരിൽ, എൻഡിടിവി പ്രമോട്ടർമാരായ പ്രണോയ് റോയ്, രാധിക റോയ് എന്നിവരുൾപ്പെടെ 7 പേർക്കും 3 സ്ഥാപനങ്ങൾക്കും ഓഹരി വിപണിയിൽ വിലക്ക്. സെക്യൂരിറ്റീസ് ആൻഡ് എക്സ്ചേഞ്ച് ബോർഡിന്റേതാണു (സെബി) നടപടി. ഓഹരി വിൽപനയിലൂടെ നേടിയ ലാഭം തിരിച്ചടയ്ക്കണം.

ഉത്തരവിനെതിരെ അപ്പീൽ നൽകുമെന്ന് കമ്പനിയുടെ അഭിഭാഷകർ വിശദീകരിച്ചു. 2006 സെപ്റ്റംബർ മുതൽ 2008 ജൂൺ വരെ ഇൻസൈഡർ ട്രേഡിങ് നടത്തിയെന്നായിരുന്നു ആരോപണം.

പ്രണോയ് റോയ്, രാധിക റോയ്, സഞ്ജയ് ദത്ത്, പ്രനിത ദത്ത് എന്നിവർക്കും ക്വാണ്ടം സെക്യൂരിറ്റീസ്, എസ്എഎൽ റിയൽ എസ്റ്റേറ്റ് എന്നീ സ്ഥാപനങ്ങൾക്കുമാണ് വിലക്ക്. പ്രണോയ് റോയും രാധികയും 16.97 കോടി രൂപ 6% പലിശ സഹിതം തിരിച്ചടയ്ക്കണം.