സമരം ചെയ്ത് വേദനിപ്പിക്കരുത്: ആരാധകരോട് രജനികാന്ത്
Mail This Article
ചെന്നൈ∙ രാഷ്ട്രീയത്തിലേക്കില്ലെന്ന തീരുമാനം മാറ്റാൻ ആരാധകരുടെ പ്രതിഷേധത്തിനാവില്ലെന്നു വ്യക്തമാക്കി സൂപ്പർ താരം രജനീകാന്ത്. ധർണ നടത്തിയും പ്രതിഷേധിച്ചും തന്നെ കൂടുതൽ വേദനിപ്പിക്കരുതെന്നു ട്വിറ്ററിൽ പോസ്റ്റ് ചെയ്ത കത്തിൽ അഭ്യർഥിച്ചു. രജനി തീരുമാനം തിരുത്തണമെന്നാവശ്യപ്പെട്ടു ചെന്നൈയിൽ കഴിഞ്ഞ ദിവസം നടന്ന ധർണയിൽ ആയിരക്കണക്കിനു പേർ പങ്കെടുത്തിരുന്നു.
രജനി മക്കൾ മൻട്രത്തിൽ നിന്നു പുറത്താക്കിയവർക്കൊപ്പം ചില ആരാധകരും ധർണയിൽ പങ്കെടുത്തതിൽ താരം അതൃപ്തി അറിയിച്ചു. മൻട്രത്തിന്റെ തീരുമാനത്തിനെതിരായാണു ധർണ സംഘടിപ്പിച്ചത്. പൊതുജനങ്ങളെ ബുദ്ധിമുട്ടിക്കാതെ പ്രതിഷേധിച്ചതിൽ സന്തോഷമുണ്ടെന്നും അദ്ദേഹം പറഞ്ഞു.
അതേസമയം, നിയമസഭാ തിരഞ്ഞെടുപ്പിൽ പിന്തുണ ഉറപ്പാക്കാൻ സമ്മർദം ചെലുത്തുന്ന പാർട്ടികളോട്, വെറുതെവിടണമെന്ന അഭ്യർഥനയായും രജനിയുടെ കത്തിനെ വ്യാഖ്യാനിക്കാമെന്നു രാഷ്ട്രീയ നിരീക്ഷകർ പറയുന്നു.
English Summary: Rajinikanth tweet fans to stop protest