ബംഗാളിൽ ബാബുൾ സുപ്രിയോ, ലോക്കറ്റ് ചാറ്റർജി മത്സരരംഗത്ത്

ന്യൂഡൽഹി ∙ അസം മൂന്നാംഘട്ട തിരഞ്ഞെടുപ്പിനും ബംഗാൾ 3, 4 ഘട്ട തിരഞ്ഞെടുപ്പുകൾക്കും തമിഴ്നാട് തിരഞ്ഞെടുപ്പിനുമുള്ള ബിജെപി സ്ഥാനാർഥികളെ പ്രഖ്യാപിച്ചു. കേന്ദ്രമന്ത്രി ബാബുൽ സുപ്രിയോ, ചലച്ചിത്ര നടി കൂടിയായ ലോക്സഭാംഗം ലോക്കറ്റ് ചാറ്റർജി, നിശിത് പ്രമാണിക്, രാജ്യസഭാംഗം സ്വപൻ ദാസ് ഗുപ്ത എന്നിവരും ബംഗാൾ നിയമസഭാ തിരഞ്ഞെടുപ്പിൽ മാറ്റുരയ്ക്കുന്നുണ്ട്.

അസൻസോൾ എംപിയായ ബാബുൾ സുപ്രിയോ ടോളിഗഞ്ച് മണ്ഡലത്തിൽ മത്സരിക്കും. ലോക്കറ്റ്് ചാറ്റർജി ചുൻചുരയിലും സ്വപൻ ദാസ്ഗുപ്ത താരകേശ്വറിലും നിശിത് പ്രമാണിക് ദിൻഹട്ടയിലും മത്സരിക്കും.

കേന്ദ്ര സർക്കാരിന്റെ മുൻ മുഖ്യ സാമ്പത്തിക ഉപദേഷ്ടാവ് അശോക് ലാഹിരി അലിപുർദ്വാറിലും മമത സർക്കാരിൽ മന്ത്രിയായിരുന്ന രാജീബ് ബാനർജി ദോംജുരിലും മാറ്റുരയ്ക്കും. രബീന്ദ്രനാഥ് ഭട്ടാചാര്യയാണ് സിംഗൂരിൽ ബിജെപി സ്ഥാനാർഥി.

അടുത്തിടെ ബിജെപിയിൽ ചേർന്ന ചലച്ചിത്ര താരങ്ങളായ യശ്ദാസ്ഗുപ്ത (ചണ്ഡിത്തല), തനുശ്രീ ചക്രബർത്തി (ശ്യാംപുർ), പായൽ സർക്കാർ (പൂർവ ബെഹാല), അഞ്ജന ബസു (ദക്ഷിണ സോനാർപുർ) എന്നിവരും പട്ടികയിലുണ്ട്. അസമിലെ 17 സീറ്റുകളിലും ബംഗാളിലെ 27 സീറ്റുകളിലുമാണു മൂന്നാംഘട്ട തിരഞ്ഞെടുപ്പ് ഏപ്രിൽ 6നു നടക്കുന്നത്.

English Summary: BJP candidates for Assam, Bengal and Tamilnadu assembly elections 2021