മുലായം സിങ് യാദവിന് ജന്മനാട്ടിൽ അന്ത്യവിശ്രമം; അഭിവാദ്യങ്ങളുമായി ആയിരങ്ങൾ

ലക്നൗ ∙ ഉത്തർപ്രദേശ് മുൻമുഖ്യമന്ത്രിയും സമാജ്‍വാദി പാർട്ടി നേതാവുമായ മുലായം സിങ് യാദവിന്റെ ഭൗതികശരീരം ജന്മനാടായ സയിഫായി ഗ്രാമത്തിൽ പൂർണ ഔദ്യോഗിക ബഹുമതികളോടെ സംസ്കരിച്ചു. ലക്ഷങ്ങളുടെ കണ്ഠങ്ങളിൽ നിന്നുയർന്ന ‘നേതാജി അമർ രഹേ’ മന്ത്രണങ്ങൾക്കിടെ മകനും പാർട്ടി അധ്യക്ഷനുമായ അഖിലേഷ് യാദവ് ചിതയ്ക്കു തീകൊളുത്തി.

പ്രതിരോധമന്ത്രിയും മൂന്നു തവണ യുപി മുഖ്യമന്ത്രിയും ആയിരുന്ന മുലായം ഡൽഹിയിലെ ആശുപത്രിയിൽ തിങ്കളാഴ്ചയാണു മരിച്ചത്. പ്രതിരോധ മന്ത്രി രാജ്നാഥ് സിങ്, ലോക്സഭാ സ്പീക്കർ ഓം ബിർല, കോൺഗ്രസ് നേതാവ് മല്ലികാർജുൻ ഖർഗെ, എൻസിപി അധ്യക്ഷൻ ശരദ് പവാർ തുടങ്ങി ഒട്ടേറെ നേതാക്കൾ സംസ്കാര ചടങ്ങിൽ പങ്കെടുത്തു. 

English Summary: 'Netaji' Mulayam Singh Yadav cremated at native village Saifai, Uttarpradesh