ചാനൽ പാക്കേജുകൾക്ക് നിരക്ക് കുറഞ്ഞേക്കും; കേബിൾ ടിവി, ഡിടിഎച്ച് നിരക്ക് നിയന്ത്രണത്തിന് ട്രായ്
Mail This Article
ന്യൂഡൽഹി ∙ കേബിൾ ടിവി, ഡിടിഎച്ച് നിരക്ക് നിയന്ത്രണവുമായി ബന്ധപ്പെട്ട് വീണ്ടും ഭേദഗതിയുമായി ടെലികോം റെഗുലേറ്ററി അതോറിറ്റി (ട്രായ്). 2023 ഫെബ്രുവരി ഒന്നിന് മാറ്റങ്ങൾ പ്രാബല്യത്തിൽ വരും.
പൂർണതോതിൽ നടപ്പാക്കിയാൽ വിവിധ ചാനൽ പാക്കേജുകൾ എടുക്കുമ്പോൾ നിരക്ക് കുറയാൻ സാധ്യതയുണ്ടെന്ന് വിദഗ്ധർ ചൂണ്ടിക്കാട്ടി. ചാനലുകൾ ഒരുമിച്ച് (ബൊക്കെ) എടുക്കുമ്പോൾ 45% വരെ ഇളവ് ലഭിക്കാം. നിലവിൽ 33% ഇളവ് നൽകാനേ ചട്ടമുള്ളൂ.
ഉദാഹരണത്തിന് 10 രൂപയുടെ 5 ചാനലുകൾ അടങ്ങിയ ബൊക്കെയ്ക്ക് നിലവിൽ 16.5 രൂപയുടെ വരെ ഇളവ് ലഭിക്കാം. ഭേദഗതി നടപ്പായാൽ ഈ ഇളവ് 22.5 രൂപ വരെയാകാം.
ബൊക്കെയിൽ ഉൾപ്പെടുത്താവുന്ന ചാനലിന്റെ നിരക്ക് 19 രൂപയാണെന്നും ട്രായ് വ്യക്തമാക്കി. മുൻപ് ഇത് 12 രൂപയായിരുന്നു. 12 രൂപയിൽ കൂടുതലുള്ള ചാനലുകൾ വ്യക്തിഗതമായി തിരഞ്ഞെടുക്കണമായിരുന്നു. ഈ നിരക്ക് 19 രൂപയാക്കി ഉയർത്തിയതോടെ ബൊക്കെയുടെ ഭാഗമായിത്തന്നെ ഉപയോക്താവിനു ലഭിക്കും. ഇതിന് 45% വരെ ഇളവും ലഭിക്കാമെന്നതിനാൽ മൊത്തത്തിലുള്ള നിരക്ക് കുറയാം.
ചാനലുകളുടെ പേര്, സ്വഭാവം, ഭാഷ എന്നിവയിലടക്കം മാറ്റങ്ങളുണ്ടെങ്കിൽ ഡിസംബർ 16നകം ബ്രോഡ്കാസ്റ്റിങ് കമ്പനികൾ ട്രായിയെ അറിയിക്കുകയും വെബ്സൈറ്റിൽ പ്രസിദ്ധീകരിക്കുകയും വേണം.
മൊബൈൽ നിരക്ക് കൂട്ടാൻ കമ്പനികൾ
ന്യൂഡൽഹി ∙ രാജ്യത്ത് എല്ലാ സർവീസ് ദാതാക്കളുടെയും മൊബൈൽ ഫോൺ സേവന നിരക്ക് ഉടൻ കൂടിയേക്കും. ആദ്യഘട്ടമായി ഹരിയാനയിലും ഒഡീഷയിലും എയർടെൽ നിരക്ക് 57% വർധിപ്പിച്ചു. മറ്റു കമ്പനികളും ഉടൻ നിരക്ക് വർധിപ്പിക്കുമെന്നാണു സൂചന. കഴിഞ്ഞ വർഷം നവംബറിൽ എയർടെൽ നിരക്കു വർധിപ്പിച്ചതിനു പിന്നാലെയാണു മറ്റു കമ്പനികളും കൂട്ടിയത്.
ഹരിയാനയിലും ഒഡീഷയിലും നിരക്ക് ഏറ്റവും കുറഞ്ഞ 99 രൂപയുടെ പ്ലാൻ എയർടെൽ നിർത്തലാക്കി; ഇനി 155 രൂപയുടേതായിരിക്കും കുറഞ്ഞ പ്ലാൻ. ഈ വർഷം മൊബൈൽ ഫോൺ നിരക്കുവർധന പ്രതീക്ഷിക്കാമെന്ന് ഫെബ്രുവരിയിൽ തന്നെ എയർടെൽ, വോഡഫോൺ–ഐഡിയ (വിഐ) എന്നീ കമ്പനികൾ സൂചന നൽകിയിരുന്നു. പിന്നീട് 5ജി സ്പെക്ട്രത്തിനായി കമ്പനികൾക്കു കോടികൾ ചെലവഴിക്കേണ്ടി വന്നു. ഒരു ഉപയോക്താവിൽ നിന്ന് ലഭിക്കുന്ന ശരാശരി വരുമാനം 200 രൂപയായി ഇക്കൊല്ലം ഉയർത്തുകയാണ് എയർടെലിന്റെ ലക്ഷ്യം; വരും വർഷങ്ങളിൽ ഇത് 300 രൂപയും.
English Summary: Channel package charges may be reduced