പാഴ്സൽ ഗോഡൗണുകളിൽ സ്നിഫർ നായ്ക്കൾ വേണം: തമിഴ്നാട് പൊലീസ്

ചെന്നൈ ∙ കോയമ്പത്തൂർ, മംഗളൂരു സ്ഫോടന സംഭവങ്ങളുടെ പശ്ചാത്തലത്തിൽ തമിഴ്നാട്ടിലെ കുറിയർ, പാഴ്സൽ സ്ഥാപനങ്ങളുടെ ഗോഡൗൺ, വെയർഹൗസ് എന്നിവിടങ്ങളിൽ സ്ഫോടക വസ്തുക്കൾ കണ്ടെത്താൻ പരിശീലനം ലഭിച്ച സ്നിഫർ നായ്ക്കളുടെ സേവനം ഉപയോഗപ്പെടുത്താൻ പൊലീസ് നിർദേശിച്ചു. 

സ്ഫോടനക്കേസുകളിലെ പ്രതികൾ ഓൺലൈനായും കുറിയർ വഴിയും സ്ഫോടന വസ്തുക്കളിൽ നിറയ്ക്കുന്നതിനുള്ള സാധനങ്ങൾ വാങ്ങിയതായി കണ്ടെത്തിയതിനെ തുടർന്നാണു നടപടി.

പൊട്ടാസ്യം നൈട്രേറ്റ്, അമോണിയം നൈട്രേറ്റ്, സൾഫർ തുടങ്ങിയവ ആരെങ്കിലും ഓർഡർ ചെയ്തിട്ടുണ്ടെങ്കിൽ വിവരം അറിയിക്കണമെന്ന് ഇ–കൊമേഴ്സ് കമ്പനികൾക്കും മറ്റു ഷോപ്പിങ് വെബ്സൈറ്റുകൾക്കും പൊലീസ് നിർദേശം നൽകി. 

ചെന്നൈ, മധുര, തിരുച്ചിറപ്പള്ളി, കോയമ്പത്തൂർ എന്നിവിടങ്ങളിൽ എംഡിഎംഎ അടക്കമുള്ള ലഹരി മരുന്നുകൾ കുറിയർ വഴി കടത്താൻ ശ്രമിച്ച സംഭവങ്ങൾ റിപ്പോർട്ട് ചെയ്തിരുന്നു.

English Summary: Sniffer dogs needed in parcel godowns says Tamilnadu police