പുർണിയ∙ അപൂർവയിനം പല്ലിയുമായി 5 പേർ പൊലീസിന്റെ പിടിയിലായി. വന്യജീവിസംരക്ഷണ നിയമത്തിലെ ഷെഡ്യൂൾ 3 വിഭാഗത്തിൽപെടുന്ന, അതീവ വംശനാശ ഭീഷണി നേരിടുന്ന ടോകെ ഗെക്കോ ഇനത്തിൽപെടുന്നതാണിത്. ഏഷ്യയിലും പസിഫിക് ദ്വീപുകളിലും വനമേഖലയി‍ലാണു സാധാരണ കണ്ടുവരുന്നത്.

രഹസ്യ വിവരത്തെ തുടർന്ന്, ബിഹാറിലെ പുർണിയയിൽ മെഡിക്കൽ സ്റ്റോറിൽ നടത്തിയ പരിശോധനയിലാണു കണ്ടെത്തിയത്. ബംഗാളിൽനിന്നു ഡൽഹിയിലേക്കു കടത്താനായിരുന്നു ശ്രമം. രാജ്യാന്തര വിപണിയി‍ൽ ഒരു കോടിയിലധികം രൂപ വിലയുണ്ടെന്നു പൊലീസ് പറഞ്ഞു. നിരോധിത കോഡീൻ അടങ്ങിയ 50 പാക്കറ്റ് കഫ് സിറപ്പും ഇവിടെ നിന്നു പിടിച്ചെടുത്തു.

English Summary: Rare Tokay Gecko lizard seized in bihar; 5 arrested