തൊഴിലില്ലായ്മ വർധിക്കുന്നു; ഡിസംബറി‍ൽ 8.3%, 16 മാസത്തെ ഏറ്റവും ഉയർന്ന നിരക്ക്

ന്യൂഡൽഹി∙ രാജ്യത്ത് തൊഴിലില്ലായ്മ നിരക്ക് 16 മാസത്തെ ഏറ്റവും ഉയർന്ന നിലയിലെത്തി. നവംബറിൽ 8% ആയിരുന്നത് ഡിസംബറിൽ 8.3% ആയി ഉയർന്നതായി സെന്റർ ഫോർ മോണിറ്ററിങ് ഇന്ത്യൻ ഇക്കോണമി (സിഎംഐഇ) റിപ്പോർട്ടിൽ ചൂണ്ടിക്കാണിക്കുന്നു. നഗരമേഖലയിൽ ഗ്രാമങ്ങളിലേതിനെക്കാൾ തൊഴിലില്ലായ്മ കൂടുതലാണ്. നഗരമേഖലയിൽ നവംബറിൽ 8.96% ആയിരുന്നത് ഡിസംബറിൽ 10.09% ആയി ഉയർന്നു. അതേ സമയം, ഗ്രാമമേഖലയിൽ നവംബറിൽ 7.55% ആയിരുന്നത് ഡിസംബറി‍ൽ 7.44% ആയി കുറഞ്ഞു. 

എന്നാൽ, നിലവിലെ നിരക്ക് ആശങ്കാജനകമല്ലെന്ന് സിഎംഐഇ റിപ്പോർട്ടിൽ ചൂണ്ടിക്കാട്ടി. തൊഴിൽപങ്കാളിത്തം ഡിസംബറിൽ 40.48% ശതമാനമാണ്. ഇത് 12 മാസത്തെ ഏറ്റവും ഉയർന്ന നിരക്കാണ്. പണപ്പെരുപ്പം ഉൾപ്പെടെയുള്ള ഘടകങ്ങളാണ് തൊഴിലില്ലായ്മ ഉയരാനുള്ള കാരണം. ഹരിയാനയിലാണ് ഏറ്റവും കൂടുതൽ – 37.4%. ഏറ്റവും കുറവ് ഒഡീഷയിലും – 0.9%. കേരളത്തിൽ 7.4%. 

English Summary: Rise in unemployment rate