ന്യൂഡൽഹി ∙ പുതിയ ആദായനികുതി സ്കീമിൽ ഭാഗമാകുന്നവർക്ക് 7 ലക്ഷം രൂപയ്ക്ക് അൽപം മുകളിലാണു വരുമാനമെങ്കിലും അധിക തുകയ്ക്കു നികുതി നൽകേണ്ടതില്ല. ഇതുസംബന്ധിച്ച ഭേദഗതി കേന്ദ്രം ധന ബില്ലിൽ വരുത്തി. ഏപ്രിൽ 1 മുതൽ പ്രാബല്യത്തിൽ വരും.

പുതിയ സ്കീമനുസരിച്ച് 7 ലക്ഷം രൂപ വരെയുള്ള വരുമാനത്തിനു നികുതി നൽകേണ്ടതില്ല. എന്നാൽ അതിനു മുകളിലുള്ള ചെറിയ തുകയ്ക്കു പോലും ഉയർന്ന നികുതിബാധ്യത വരുന്ന സാഹചര്യമുണ്ടായിരുന്നു. വരുമാനം 7,00,100 രൂപയെങ്കിൽ 25,010 രൂപ നികുതി വരും. ഇതൊഴിവാക്കാനാണു ഭേദഗതി.

ഇതനുസരിച്ച് 7,27,777 രൂപ വരുമാനത്തിനു വരെ പുതിയ സ്കീമിൽ നികുതി ഒഴിവാകുമെന്നാണു വിദഗ്ധരുടെ വിലയിരുത്തൽ. പഴയ സ്കീമിലുള്ളവർക്ക് ഈ ആനുകൂല്യം ലഭ്യമല്ല.

English Summary: New scheme limit in income tax raised