പ്രതിരോധ മന്ത്രിമാരുടെ സമ്മേളനം തുടങ്ങി
Mail This Article
ന്യൂഡൽഹി ∙ ഷാങ്ഹായ് കോ ഓപ്പറേഷൻ ഓർഗനൈസേഷൻ (എസ്സിഒ) കൂട്ടായ്മയുടെ ഭാഗമായി ഇന്ത്യ ആതിഥ്യം വഹിക്കുന്ന പ്രതിരോധ മന്ത്രിമാരുടെ ദ്വിദിന സമ്മേളനത്തിനു ഡൽഹിയിൽ തുടക്കം. ചൈനീസ് പ്രതിരോധ മന്ത്രി ലീ ഷാങ്ഫു, റഷ്യൻ പ്രതിരോധ മന്ത്രി സെർജി ഷൊയ്ഗു, ഇറാൻ പ്രതിരോധ മന്ത്രി മുഹമ്മദ് റേസ ഖെറെയ് അഷ്ത്യാനി എന്നിവരുമായി പ്രതിരോധമന്ത്രി രാജ്നാഥ് സിങ് വെവ്വേറെ ചർച്ച നടത്തി.
ചൈനീസ് മന്ത്രിയുമായുള്ള ചർച്ചയിൽ കിഴക്കൻ ലഡാക്ക് അതിർത്തിയിലെ സംഘർഷം ഇന്ത്യ ഉന്നയിച്ചു. കിഴക്കൻ ലഡാക്കിൽ കടന്നുകയറിയ പ്രദേശങ്ങളിൽ നിന്നെല്ലാം ചൈനീസ് സേന പൂർണമായി പിൻമാറിയാൽ മാത്രമേ അതിർത്തിയിൽ സമാധാനം പുനഃസ്ഥാപിക്കാനാവൂ എന്നാണ് ഇന്ത്യയുടെ നിലപാട്. വിവിധ രാജ്യങ്ങളിലെ പ്രതിരോധ മന്ത്രിമാർ സംയുക്തമായി പങ്കെടുക്കുന്ന സമ്മേളനം ഇന്നു നടക്കും. പാക്ക് പ്രതിരോധ മന്ത്രി ഖവാജ മുഹമ്മദ് ആസിഫ് ഓൺലൈനായി പങ്കെടുക്കും.
English Summary: SCO defence ministers meet