ദ്രൗപദി മുർമു: രാഷ്ട്രപതി, ഗ്രാമത്തിലെത്തിയാൽ കൃഷിക്കാരി

പട്ന ∙ രാഷ്ട്രപതിപദമൊഴിഞ്ഞാൽ ഗ്രാമത്തിലേക്കു മടങ്ങി കൃഷിയിൽ ഏർപ്പെടുമെന്നു ദ്രൗപദി മുർമു പറഞ്ഞു. കർഷകന്റെ മകളായ തനിക്ക് കൃഷിയോട് ഏറെ ഇഷ്ടമുണ്ടെന്നും രാഷ്ട്രപതി പറഞ്ഞു. ബിഹാർ സർക്കാരിന്റെ കാർഷികവികസന മാർഗരേഖ പ്രകാശനം ചെയ്യുകയായിരുന്നു. ബിഹാറിൽ 3 ദിവസത്തെ സന്ദർശനത്തിനെത്തിയതാണു രാഷ്ട്രപതി. 

സംസ്ഥാന കൃഷി മന്ത്രിയുമായും കർഷക പ്രതിനിധികളുമായും രാഷ്ട്രപതി ചർച്ച നടത്തി. ബിഹാറിലെ പാടങ്ങളിലെല്ലാം 2025 ആകുമ്പോഴേക്കും ജലലഭ്യത ഉറപ്പാക്കുമെന്നു മുഖ്യമന്ത്രി നിതീഷ് കുമാർ പ്രഖ്യാപിച്ചു. 

രാഷ്ട്രപതിയുടെ ജന്മനാട്ടിലേക്ക് ആദ്യ ട്രെയിൻ

ന്യൂഡൽഹി ∙ ഒഡീഷയിലെ ആദിവാസിമേഖലയായ മയൂർഭഞ്ജ് ജില്ലയ്ക്ക് ട്രെയി‌നെന്ന സ്വപ്നം സഫലമായി. രാഷ്ട്രപതി ദ്രൗപദി മുർമുവിന്റെ ജന്മനാടായ റായ്‌രംഗ്പുറിൽ സ്റ്റോപ്പുള്ള മെയിൽ, എക്സ്പ്രസ് ട്രെയിനുകൾ റെയിൽവേ മന്ത്രി അശ്വിനി വൈഷ്ണവ് പ്രഖ്യാപിച്ചു.