കോവിഡ് വില്ലനായി; 2022 ൽ 75 ലക്ഷം പേർക്ക് ക്ഷയരോഗം

‍ന്യൂഡൽഹി ∙ 2022 ൽ ലോകത്ത് 75 ലക്ഷം പേർക്കു ക്ഷയരോഗം സ്ഥിരീകരിച്ചതായി ലോകാരോഗ്യ സംഘടന അറിയിച്ചു. 1995 ൽ ക്ഷയരോഗ നിരീക്ഷണം ആരംഭിച്ചതിനുശേഷമുള്ള ഉയർന്ന നിരക്കാണിതെന്ന് 192 രാജ്യങ്ങളിൽ നിന്നുള്ള ഗ്ലോബൽ ടിബി റിപ്പോർട്ട് അടിസ്ഥാനമാക്കി സംഘടന വ്യക്തമാക്കുന്നു. ക്ഷയരോഗം മൂലം 2022 ൽ മരിച്ചത് 13 ലക്ഷം പേരാണ്. 2020– 22 ൽ 5 ലക്ഷം പേരെങ്കിലും രോഗംമൂലം മരിച്ചതിനു കാരണം കോവിഡാണെന്നും റിപ്പോർട്ട് വ്യക്തമാക്കുന്നു.

2020 ലും 2021 ലും ക്ഷയരോഗം ബാധിച്ചവരുടെ എണ്ണത്തിൽ വൻ കുറവ് രേഖപ്പെടുത്തിയ ഇന്ത്യ, ഇന്തൊനീഷ്യ, ഫിലിപ്പീൻസ് എന്നിവിടങ്ങളിലെല്ലാം 2022 ൽ രോഗികൾ കൂടി. കേരളത്തിൽ ഈ വർഷം ഇതുവരെ ക്ഷയരോഗം ബാധിച്ച് രണ്ടായിരത്തോളം പേർ മരിച്ചു. 25,000 പേർക്ക് പുതുതായി രോഗം സ്ഥിരീകരിക്കുകയും ചെയ്തു.