എംഎൽഎമാരെ 50 കോടിക്ക് ‘വാങ്ങാൻ’ ബിജെപി ശ്രമിച്ചു: സിദ്ധരാമയ്യ

ബെംഗളൂരു ∙ കർണാടക സർക്കാരിനെ അട്ടിമറിക്കാനും രാജ്യസഭാ തിരഞ്ഞെടുപ്പിൽ കൂറുമാറി വോട്ടു ചെയ്യിക്കാനുമായി കോൺഗ്രസ് എംഎൽഎമാർക്കു ബിജെപി 50 കോടി രൂപ വീതം വാഗ്ദാനം ചെയ്തെന്നു മുഖ്യമന്ത്രി സിദ്ധരാമയ്യ ആരോപിച്ചു. ഹിമാചൽപ്രദേശിൽ കോൺഗ്രസ് സർക്കാർ നേരിടുന്ന കൂറുമാറ്റ പ്രതിസന്ധിയെക്കുറിച്ചുള്ള ചോദ്യങ്ങൾക്കു മറുപടി നൽകുകയായിരുന്നു. ‘ബിജെപി വാഗ്ദാനം എംഎൽഎമാരെല്ലാം നിരസിച്ചു. വോട്ട് വാങ്ങി അധികാരത്തിലെത്താൻ കഴിയാത്ത പാർട്ടിയാണവർ. 2008ലും 2019ലും മറ്റു പാർട്ടികളിലെ എംഎൽഎമാരെ ‘വിലയ്ക്കു വാങ്ങി’യാണ് ബിജെപി സർക്കാർ രൂപീകരിച്ചത്’– മുഖ്യമന്ത്രി കുറ്റപ്പെടുത്തി.