മമതയുടെ അനിമേറ്റഡ് ന‍ൃത്ത വിഡിയോ സമൂഹമാധ്യമത്തിൽ പങ്കുവച്ചയാൾക്കെതിരേ കേസ്; ഒളിയമ്പുമായി മോദി

കൊൽക്കത്ത ∙ ബംഗാൾ മുഖ്യമന്ത്രി മമത ബാനർജി ന‍ൃത്തം ചെയ്യുന്നതായ അനിമേറ്റഡ് വിഡിയോ സമൂഹമാധ്യമത്തിൽ പങ്കുവച്ചയാൾക്കെതിരേ കൊൽക്കത്ത പൊലീസ് കേസെടുത്തതിനെതിരെ പ്രധാനമന്ത്രി നരേന്ദ്ര മോദിയുടെ ഒളിയമ്പ്. സമാന മട്ടിൽ മോദി നൃത്തം ചെയ്യുന്ന വിഡിയോ സമൂഹമാധ്യമമായ എക്സിൽ ഒരാൾ പോസ്റ്റ് ചെയ്തിരുന്നു.

മറ്റുള്ളവരെപ്പോലെ താനും ഇത് ആസ്വദിക്കുന്നുവെന്നും തിരഞ്ഞെടുപ്പൂചൂടിൽ ഇതെല്ലാം സന്തോഷമാണെന്നും കുറിച്ച് മോദി ഇതു ഷെയർ ചെയ്തു. മോദി ‘കൂൾ' ആണെന്നും മമത ഏകാധിപതിയാണെന്നും ബിജെപി അനുകൂലികൾ പിന്നാലെ സമൂഹമാധ്യമ പ്രചാരണം തുടങ്ങി. യഥാർഥ ഏകാധിപതിയുടെ വെറും പിആർ തന്ത്രങ്ങൾ മാത്രമാണിതെന്ന് തൃണമൂൽ തിരിച്ചടിച്ചു.