ചികിത്സ വീട്ടിൽ: മാർഗനിർദേശങ്ങളായില്ല

തിരുവനന്തപുരം ∙ ലക്ഷണങ്ങളില്ലാത്ത കോവിഡ് ബാധിതരെ വീട്ടിൽ ചികിത്സിക്കാനുള്ള മാർഗനിർദേശങ്ങൾ തയാറായില്ല. തിരുവനന്തപുരത്തു പരീക്ഷണാടിസ്ഥാനത്തിൽ വീട്ടിൽ ചികിത്സ തുടങ്ങാൻ കലക്ടർ ഉത്തരവിറക്കിയിട്ട് ഒരാഴ്ചയായെങ്കിലും മാർഗനിർദേശങ്ങളും മുന്നൊരുക്കങ്ങളും പൂർത്തിയാകാത്തതിനാൽ ആരോഗ്യ വകുപ്പ് നടപടികളൊന്നും തുടങ്ങിയിട്ടില്ല. 

വീട്ടിൽ ചികിത്സയ്ക്കുള്ള മാർഗനിർദേശങ്ങൾ തയാറാക്കാൻ വിദഗ്ധ സമിതിയോടും ആരോഗ്യ മേഖലയിലെ വിദഗ്ധരോടും സർക്കാർ ആവശ്യപ്പെട്ടിരുന്നു. ഇവ പരിശോധിച്ച് അന്തിമ മാർഗരേഖ തയാറാക്കും. വീട്ടിൽ കഴിയുന്നവർക്കു രക്തത്തിലെ ഓക്സിജന്റെ അളവു പരിശോധിക്കാനുള്ള പൾസ് ഓക്സിമീറ്റർ ലഭ്യമാക്കേണ്ടി വരുമെന്നത് ഉൾപ്പെടെയുള്ള പ്രായോഗിക പ്രശ്നങ്ങൾ സർക്കാരിനു മുന്നിലുണ്ട്.

ഇങ്ങനെ കഴിയുന്നവരുടെ ആരോഗ്യസ്ഥിതി ഫോൺ മുഖേന പരിശോധിക്കാനും ആവശ്യമെങ്കിൽ കോവിഡ് ആശുപത്രികളിലേക്കു മാറ്റാനുമുള്ള സംവിധാനങ്ങൾ തദ്ദേശ സ്ഥാപന തലത്തിൽ സജ്ജമാക്കുകയും വേണം.  ആരോഗ്യ പ്രവർത്തകർക്കു വീട്ടിൽ ചികിത്സയ്ക്കായി ആരോഗ്യ വകുപ്പും ദുരന്തനിവാരണ അതോറിറ്റിയും മാർഗരേഖ പുറത്തിറക്കിയിരുന്നു. 

Egnlish summary: Covid treatment at home