സൂമിൽ ഒന്നിച്ച് ഒസിയും മക്കളും; ലൈവിൽ ഒരു കുടുംബചിത്രം
Mail This Article
അച്ചു അൽപം സങ്കടത്തിലാണ്. അപ്പൻ, രാഷ്ട്രീയ ജീവിതത്തിലെ വലിയൊരു നാഴികക്കല്ലു പിന്നിടുകയാണ്. ഈ സമയം കേരളത്തിൽ ഉണ്ടാവേണ്ടതാണ്. പക്ഷേ, കോവിഡ് കാരണം വരാനാകില്ല. മറിയവും ചാണ്ടിയും അപ്പയ്ക്കൊപ്പമുണ്ട്. അതിലൊരു ചെറിയ കുശുമ്പില്ലാതെയുമില്ല! ഉമ്മൻ ചാണ്ടിയും മക്കളും മലയാള മനോരമയ്ക്കു വേണ്ടി സൂമിൽ ഒന്നിച്ചപ്പോൾ...
മലയാള മനോരമ: ഇവിടെ ഉണ്ടായിരുന്നെങ്കിൽ അച്ചു ഈ ദിവസം എങ്ങനെ ആഘോഷിച്ചേനേ?
അച്ചു: ഞാൻ ഒരു കലക്കുകലക്കിയെനേ. ഞങ്ങൾക്കു വേണ്ടി ഒരു സ്പെഷൽ ആഘോഷമൊക്കെ ഒരുക്കാമായിരുന്നു. സ്പെഷൽ കേക്കും ഒക്കെ.
ചാണ്ടി: അതേയതേ നീ ഒരു ഇവന്റ് മാനേജരുമാണല്ലോ!
അച്ചു: അതാണ്! അപ്പയുടെ നിയമസഭയിലെ 50 വർഷം നമുക്കൊക്കെ എന്നും ഓർമിക്കാനുള്ള ഒരു സുവനീർ ഞാൻ തയാറാക്കിയേനെ! എന്നിട്ട് നമ്മുടെ കുടുംബത്തിലെ എല്ലാവർക്കും കൊടുക്കാമായിരുന്നു.
ചാണ്ടി: സാരമില്ല. കോവിഡൊക്കെ കഴിയുമല്ലോ. അപ്പോ നമുക്ക് ചെയ്യാം!
അച്ചു: അതെ. അതിനാണ് ഞാനും കാത്തിരിക്കുന്നത്. പക്ഷേ, പുതുപ്പള്ളിയിലെ ഈ ദിവസങ്ങളൊക്കെ ഞാൻ മിസ് ചെയ്യും.
മറിയം: സാരമില്ല, എല്ലാം ലൈവായി കാണാമല്ലോ.
അച്ചു: ഇവിടെയുമുണ്ട് കുറച്ചു പരിപാടികൾ. പ്രവാസി സംഘടനകൾ ഭക്ഷണ വിതരണവും രക്തദാനവും ഒക്കെ നടത്തുന്നുണ്ട്.
(ഉമ്മൻ ചാണ്ടിയും സൂമിൽ ചേരുന്നു)
അച്ചു: അപ്പ, ഞാനാണ്! വലിയ തിരക്കിലാണല്ലേ?
ഉമ്മൻ ചാണ്ടി: അതേയതേ. ചാനൽ ഇന്റർവ്യൂകൾ, പത്രക്കാർ...
ചാണ്ടി: 12 ചാനൽ ഇന്റർവ്യൂ കഴിഞ്ഞു. ഇനിയും രണ്ടെണ്ണം വരാനുണ്ട്!
അച്ചു: അപ്പ, എനിക്ക് അവിടെ വരണമെന്നുണ്ടായിരുന്നു. പക്ഷേ, ഇപ്പോൾ വരാതിരിക്കുന്നതല്ലേ നല്ലത്?
ഉമ്മൻ ചാണ്ടി: അതേ. ഇപ്പോൾ വരണ്ട. അവിടെ ചെയ്യാനുള്ളതു ചെയ്യൂ. ഇവിടുത്തെ കാര്യങ്ങൾ നടക്കും.
അച്ചു: എന്റെ വകയായി അപ്പയ്ക്ക് ഒരു സാധനം തരണമെന്ന് ചാണ്ടിയോടു പറഞ്ഞിട്ടുണ്ട്.
ഉമ്മൻ ചാണ്ടി: എന്താ അത്?
ചാണ്ടി: ങേ, എന്ത്?
അച്ചു: ഒരുമ്മ!
സൂമിൽ പൊട്ടിച്ചിരി!
ഉമ്മൻ ചാണ്ടി: അപ്പോ ശരി മോളെ. ഉടനെ കാണാം. (അടുത്ത സന്ദർശകരെത്തി. ഉമ്മൻ ചാണ്ടി അവരുടെ അടുത്തേക്ക്.)
അച്ചു: അപ്പയെ ഞാൻ വിളിച്ചിട്ട് മൂന്നാഴ്ചയെങ്കിലുമായി. അപ്പയ്ക്കു സംസാരിക്കാൻ ചെറിയ ബുദ്ധിമുട്ടുണ്ട്. ഞാൻ കൂടെ വിളിച്ചു കൂടുതൽ സംസാരിപ്പിക്കേണ്ട എന്നു കരുതി.
ചാണ്ടി: ശരിയാണ്. 2015 ൽ ചെറിയൊരു പ്രശ്നം വന്നു. 2018 ലും 19 ലും അത് ആവർത്തിച്ചു. സൗണ്ട് റെസ്റ്റ് എടുക്കാൻ പക്ഷേ അപ്പയ്ക്കു പറ്റില്ലല്ലോ!
മറിയം: ശരിയാണ്. അപ്പയ്ക്ക് എപ്പോഴും ആളുകളോടു മിണ്ടിക്കൊണ്ടിരിക്കണം. ഫോൺ ഒന്നും വന്നില്ലെങ്കിൽ സങ്കടമാണ്!
മലയാള മനോരമ: നിങ്ങൾക്ക് അപ്പനിൽ ഏറ്റവും ഇഷ്ടപ്പെട്ട കാര്യമെന്താണ്? ഇഷ്ടമില്ലാത്തതും?
അച്ചു: അപ്പയുടെ അറിവ്, സഹിഷ്ണുത, ഇച്ഛാശക്തി... അങ്ങനെ പലതുമുണ്ട്. പക്ഷേ, എന്നെ ഏറ്റവും അദ്ഭുതപ്പെടുത്തുന്നത്, നിസ്വാർഥ്വതയാണ്. ഒരു മനുഷ്യന് ഇങ്ങനെ നിസ്വാർഥനാകാൻ കഴിയുമോ എന്നത് ആശ്ചര്യമാണ്. അപ്പയുടെ ദൗർബല്യവും അതാണ്.
മറിയം: ശരിയാണ്. അനുകമ്പയും ക്ഷമയും നിസ്വാർഥതയും ഇത്രയും ഞാൻ വേറൊരാളിൽ കണ്ടിട്ടില്ല. പിന്നെ, അപ്പ ഇങ്ങനെയായതുകൊണ്ട് ഞങ്ങൾക്കു ചില നഷ്ടങ്ങളുണ്ട്. ഒരു സിനിമയ്ക്കു പോകാൻ കിട്ടില്ല, സ്കൂളിലോ കോളജിലോ ഒന്നു വരില്ല! പക്ഷേ, ഞങ്ങൾ മൂന്നും ചെറുപ്പത്തിലേ ആ യാഥാർഥ്യവുമായി പൊരുത്തപ്പെട്ടതാണ്.
ചാണ്ടി: രണ്ടുപേരും പറഞ്ഞതിനു പുറമേ, രാഷ്ട്രീയ വിദ്യാർഥി എന്ന നിലയിൽ എന്റെ ആരാധന അപ്പയുടെ പ്രായോഗികജ്ഞാനത്തിലും ബുദ്ധിയിലുമാണ്. ഏതു പ്രശ്നത്തിനും അപ്പയുടെ കയ്യിൽ പരിഹാരമുണ്ട്. പിന്നെ ആരെയും വേദനിപ്പിക്കാതിരിക്കാനുള്ള ശ്രദ്ധ. രണ്ടും വലിയ പാഠമാണ്.
മലയാള മനോരമ: ഈ ഘട്ടത്തിൽ അപ്പയ്ക്കു നിങ്ങൾ മൂന്നു പേരും എന്ത് ഉപദേശമാണു കൊടുക്കുക?
വീണ്ടും ചിരി!
മൂന്നു പേരും: ഇത്രയും ജീവിതം കണ്ട, അതിലൂടെ നായകനായി മുന്നേറുന്ന അപ്പയ്ക്ക് ഞങ്ങൾ എന്തു ഉപദേശം കൊടുക്കാനാ?
ആരോഗ്യകാര്യത്തിൽ കുറച്ചൂടെ ശ്രദ്ധയാകാം എന്നു മാത്രമേ പറയാനുള്ളൂ.
അച്ചു: അപ്പോ ചാണ്ടീ, ഞാൻ പറഞ്ഞതു കൊടുക്കുന്ന കാര്യം മറക്കരുത്.
ചാണ്ടി: യെസ്, യെസ്, അവിടെ സമാധാനത്തോടെ ഇരുന്നോ. ഇവിടെ ഞങ്ങൾ നോക്കിക്കോളാം!
English summary: Oommen Chandy zoom meet with family