തദ്ദേശ തിരഞ്ഞെടുപ്പ്: സംവരണം തീരുമാനിക്കാനുള്ള നറുക്കെടുപ്പ് തീയതികളായി

തിരുവനന്തപുരം∙ തദ്ദേശ സ്ഥാപനങ്ങളിലേക്കുള്ള തിരഞ്ഞെടുപ്പിനു മുന്നോടിയായി നിയോജക മണ്ഡലങ്ങൾ/ വാർഡുകൾ എന്നിവയുടെ സംവരണക്രമം നറുക്കെടുപ്പിലൂടെ തീരുമാനിക്കാൻ ഉദ്യോഗസ്ഥരെ ചുമതലപ്പെടുത്തിയും സമയവും സ്ഥലവും നിശ്ചയിച്ചും വിജ്ഞാപനമായി.

∙ 941 ഗ്രാമപഞ്ചായത്തുകളിലേക്ക് ഈ മാസം 28 മുതൽ ഒക്ടോബർ 1 വരെയും 152 ബ്ലോക്ക് പഞ്ചായത്തുകളിലേക്കും 14 ജില്ലാ പഞ്ചായത്തുകളിലേക്കും ഒക്ടോബർ 5 നുമാണ് നറുക്കെടുപ്പെന്നു സംസ്ഥാന തിരഞ്ഞെടുപ്പ് കമ്മിഷണർ വി.ഭാസ്കരൻ അറിയിച്ചു. അതതു ജില്ലാ തിരഞ്ഞെടുപ്പ് ഉദ്യോഗസ്ഥനാണ് (കലക്ടർ) ഗ്രാമ/ബ്ലോക്ക്/ജില്ലാ പഞ്ചായത്തുകളിലേക്കുള്ള നറുക്കെടുപ്പ് നടത്തുക.

∙ 86 നഗരസഭകളിലെ നറുക്കെടുപ്പ് 28 മുതൽ ഒക്ടോബർ 1 വരെയാണ്. തെക്കൻ മേഖലയിൽ ഉൾപ്പെടുന്ന നഗരസഭകളുടെ വാർഡുകളുടെ നറുക്കെടുപ്പ് ഈ മാസം 28, 29, 30 തീയതികളിലായി രാവിലെ 10 ന് കൊല്ലം ടി.എം.വർഗീസ് സ്മാരക ഗ്രന്ഥശാലാ ഹാളിൽ നടക്കും.

മധ്യമേഖലയിലെ നഗരസഭകളുടേത് (പാലക്കാട് ജില്ലയിലെ എല്ലാ നഗരസഭകളും ഉൾപ്പെടെ) 28, 29, ഒക്ടോബർ 1 തീയതികളിലായി 10 ന് കൊച്ചി കോർപറേഷൻ ടൗൺ ഹാളിലാണ്. വടക്കൻ മേഖലയിലെ നഗരസഭകളുടേത് 29, 30, ഒക്ടോബർ 1 തീയതികളിലായി രാവിലെ 10 ന് കോഴിക്കോട് ടൗൺ ഹാളിൽ നടക്കും. ഇതിനു തെക്കൻ, മധ്യ, വടക്കൻ മേഖലകളിലെ നഗരകാര്യ റീജനൽ ജോയിന്റ് ഡയറക്ടർമാരെ ചുമതലപ്പെടുത്തി.

∙ 6 കോർപറേഷനുകളിലേക്ക് ഈ മാസം 28, 30, ഒക്ടോബർ 6 തീയതികളിൽ നഗരകാര്യ ഡയറക്ടറാണു നറുക്കെടുപ്പ് നടത്തുക. കോഴിക്കോട്, കണ്ണൂർ കോർപറേഷനുകളിലെ നറുക്കെടുപ്പ് 28 ന് യഥാക്രമം രാവിലെ 10 നും ഉച്ചയ്ക്കു 2 നും ആയി കോഴിക്കോട് ടൗൺ ഹാളിൽ നടക്കും.

കൊച്ചി, തൃശൂർ കോർപറേഷനുകളിലേതു 30 ന് യഥാക്രമം രാവിലെ 10 നും ഉച്ചയ്ക്ക് 2 നും ആയി കൊച്ചി കോർപറേഷൻ ടൗൺ ഹാളിലാണ്. തിരുവനന്തപുരം, കൊല്ലം കോർപറേഷനുകളിലേത് ഒക്ടോബർ 6 ന് യഥാക്രമം രാവിലെ 10 നും ഉച്ചയ്ക്ക് 2 നും ആയി തിരുവനന്തപുരം കലക്ടറേറ്റിൽ നടക്കും.

English summary: Local body election Kerala