പ്രചാരണത്തിന് ‘ഭൂരിപക്ഷം’ വേണ്ട, വോട്ട് ചോദിക്കാൻ 5 പേർ; റോഡ് ഷോയ്ക്ക് 3 വാഹനം
Mail This Article
തിരുവനന്തപുരം ∙ കോവിഡ് കാലത്ത് മാസ്കും സാനിറ്റൈസറും ഉപയോഗിച്ചും അകലം പാലിച്ചും തദ്ദേശ തിരഞ്ഞെടുപ്പു നടത്താൻ സംസ്ഥാന തിരഞ്ഞെടുപ്പ് കമ്മിഷന്റെ മാർഗനിർദേശങ്ങളായി. വീട്ടിൽ വോട്ടു ചോദിക്കാൻ പോകുമ്പോൾ സ്ഥാനാർഥി ഉൾപ്പെടെ പരമാവധി 5 പേർ. സ്ഥാനാർഥികളെ സ്വീകരിക്കാൻ ഹാരം, പൂച്ചെണ്ട്, നോട്ടുമാല, ഷാൾ തുടങ്ങിയവ പാടില്ല. റോഡ് ഷോയ്ക്കും വാഹനറാലിക്കും പരമാവധി 3 വാഹനം. ജാഥയും ആൾക്കൂട്ടവും കലാശക്കൊട്ടും പറ്റില്ല.
മറ്റു പ്രധാന നിർദേശങ്ങൾ
∙ പത്രിക സമർപ്പിക്കാൻ സ്ഥാനാർഥി ഉൾപ്പെടെ 3 പേർ മാത്രം. പ്രചാരണത്തിനു നോട്ടിസും ലഘുലേഖകളും ചുരുക്കുക. സമൂഹമാധ്യമങ്ങൾ പരമാവധി ഉപയോഗപ്പെടുത്തുക.
∙ കോവിഡ് പോസിറ്റീവായാൽ സ്ഥാനാർഥി ക്വാറന്റീനിൽ പ്രവേശിക്കണം. ഫലം നെഗറ്റീവായാൽ ആരോഗ്യ വകുപ്പിന്റെ അനുമതിയോടെ തിരികെ പ്രചാരണത്തിന് എത്താം.
∙ പോളിങ് ബൂത്തിനകത്ത് ഒരേസമയം 3 വോട്ടർമാർ മാത്രം. തിരഞ്ഞെടുപ്പ് ഉദ്യോഗസ്ഥർക്കും കോവിഡ് പോസിറ്റീവ് ആയവർക്കും ക്വാറന്റീനിലുള്ളവർക്കും തപാൽ വോട്ട്.