മുതിർന്ന പൗരന്മാർക്ക് വാതിൽപ്പടി സേവനം
Mail This Article
തിരുവനന്തപുരം ∙ മുതിർന്ന പൗരന്മാർക്കു സർക്കാർ സേവനം വീടുകളിൽ ലഭ്യമാക്കുന്നതുൾപ്പെടെ 10 പദ്ധതികൾ കൂടി മുഖ്യമന്ത്രി പിണറായി വിജയൻ പുതുവത്സര ദിനത്തിൽ പ്രഖ്യാപിച്ചു. 2 ഘട്ടമായി പ്രഖ്യാപിച്ച, 100 ദിവസം വീതമുള്ള പദ്ധതികൾക്കു പുറമേയാണിത്.
∙ മുതിർന്ന പൗരന്മാർ സർക്കാർ ആനുകൂല്യങ്ങൾ ലഭിക്കാനും പ്രശ്നങ്ങൾ അവതരിപ്പിക്കാനും ഓഫിസുകളിൽ ഹാജരാകുന്നത് ഒഴിവാക്കും. വിജ്ഞാപനം 10നകം. മസ്റ്ററിങ്, ലൈഫ് സർട്ടിഫിക്കറ്റ്, സാമൂഹിക സുരക്ഷാ പെൻഷൻ അപേക്ഷ, സിഎംഡിആർഎഫിലെ സഹായം, ജീവൻരക്ഷാ മരുന്നുകൾ എന്നിവയാണ് ആദ്യഘട്ടത്തിലെ സേവനങ്ങൾ. ക്രമേണ എല്ലാ സേവനങ്ങളും വീട്ടിലെത്തിക്കും.
∙ 65 വയസ്സിനു മുകളിലുള്ളവർക്കും (പ്രത്യേകിച്ച്, മറ്റുള്ളവരുടെ സഹായം ലഭ്യമല്ലാത്തവർ), ഭിന്നശേഷിക്കാർക്കും ഭവന സന്ദർശനത്തിലൂടെ സർക്കാർ സേവനങ്ങളുടെ ആവശ്യം മനസ്സിലാക്കി ലഭ്യമാക്കുന്ന പരിപാടി. ഇത് 15 ന് ആരംഭിക്കും.
∙ വിദ്യാർഥി പ്രതിഭാ ധനസഹായ പദ്ധതി: വാർഷിക വരുമാനം 2.5 ലക്ഷത്തിൽ താഴെയുള്ള കുടുംബങ്ങളിൽ മികച്ച മാർക്കോടെ ബിരുദപഠനം പൂർത്തിയാക്കുന്ന 1000 വിദ്യാർഥികൾക്ക് ഒരു ലക്ഷം രൂപ സഹായം. രാജ്യാന്തര പ്രശസ്തരുമായി ബിരുദ-ബിരുദാനന്തര വിദ്യാർഥികൾക്ക് ആശയവിനിമയം നടത്താൻ എമിനന്റ് സ്കോളേഴ്സ് ഓൺലൈൻ പരിപാടി ഈ മാസം മുതൽ.
∙ അഴിമതിമുക്ത കേരളം പദ്ധതി: സർക്കാർ രൂപീകരിക്കുന്ന അതോറിറ്റിക്കു കീഴിൽ 26 ന് ആരംഭിക്കും. അഴിമതി സംബന്ധിച്ച പരാതി/വിവരം സോഫ്റ്റ്വെയറിലൂടെ അറിയിക്കാം.
∙ കുട്ടികൾക്കിടയിലെ ആത്മഹത്യാ പ്രവണത ചെറുക്കാൻ പദ്ധതി: 1024 സ്കൂൾ കൗൺസലർമാരെ കരാർ അടിസ്ഥാനത്തിൽ നിയമിക്കും. മാസത്തിൽ 2 തവണ ബ്ലോക്ക് തലത്തിൽ രക്ഷിതാക്കൾക്കു കൗൺസലിങ്. സ്കൂളുകളിൽ 20 കുട്ടികൾക്ക് ഒരു അധ്യാപകൻ എന്ന ക്രമത്തിൽ നിരീക്ഷണം. പ്രശ്നങ്ങൾ നേരിടുന്ന സ്ത്രീകൾക്കായി ഓൺലൈൻ കൺസൽറ്റേഷൻ.
∙ കുട്ടികളുടെ ആരോഗ്യ സുരക്ഷ: 10–18 പ്രായപരിധിക്കാരിൽ വിളർച്ച (അനീമിയ) ഉള്ളവരെ ഫെബ്രുവരി 15നകം കണ്ടെത്തും; തുടർന്ന് പോഷകാഹാരമെത്തിക്കും.
∙ ഗ്രീൻ റിബേറ്റ്: പ്രകൃതിസൗഹൃദ ഗാർഹിക നിർമാണങ്ങൾക്ക് ആദ്യം ഒറ്റത്തവണയായി അടയ്ക്കുന്ന കെട്ടിട നികുതിയിൽ നിശ്ചിത ശതമാനം ഇളവ്.
∙ സത്യമേവ ജയതേ: ഇന്റർനെറ്റിനെയും സമൂഹമാധ്യമങ്ങളെയും നിയന്ത്രിക്കുന്ന നിയമങ്ങളും മാനദണ്ഡങ്ങളും അറിയാനും തെറ്റായ വിവരങ്ങൾ തിരിച്ചറിയാനും ഡിജിറ്റൽ/മീഡിയ സാക്ഷരതാ പരിപാടി.
∙ എല്ലാ വില്ലേജുകളിലും പ്രഭാത-സായാഹ്ന സവാരിക്കും കുട്ടികൾക്കു കളിക്കാനും ഫെബ്രുവരിയോടെ പൊതു ഇടം.
∙ മടങ്ങിവന്ന പ്രവാസികൾക്കു ജോലി ചെയ്തിരുന്ന സ്ഥാപനങ്ങളിൽ നിന്ന് ആനുകൂല്യങ്ങൾ ലഭ്യമാക്കാനുള്ള സർക്കാർ രേഖകൾ അപേക്ഷിച്ചു 15 ദിവസത്തിനകം.
Content Highlights: Special govt service for senior citizens in Kerala