ജെൻഡർ ന്യൂട്രൽ യൂണിഫോം; ആൺ–പെൺ ഭേദം വെടിയാൻ ആലപ്പുഴ

ആലപ്പുഴ ∙ ജില്ലാ പഞ്ചായത്തിനു കീഴിലുള്ള 48 സ്കൂളുകളിൽ ജെൻഡർ ന്യൂട്രൽ യൂണിഫോം ഏർപ്പെടുത്തുന്നതിന് വിദ്യാഭ്യാസ വകുപ്പുമായി ധാരണയായി. ഇന്നു ചേരുന്ന ജില്ലാ പഞ്ചായത്ത് വിദ്യാഭ്യാസ സ്ഥിരം സമിതി ഇതിന് അംഗീകാരം നൽകും. ജില്ലാ പഞ്ചായത്ത് ബജറ്റിൽ പ്രഖ്യാപിച്ച അപ്പാരൽ യൂണിറ്റിന്, ഈ യൂണിഫോമുകൾ തയ്ച്ചു കൊണ്ടു തുടക്കമിടും.

ജെൻഡർ ന്യൂട്രൽ യൂണിഫോം ഏർപ്പെടുത്തുന്നതു സംബന്ധിച്ച് ചേർന്ന യോഗത്തിൽ വിദ്യാഭ്യാസ ഉപഡയറക്ടർ ഉൾപ്പെടെ വകുപ്പിലെ ഉദ്യോഗസ്ഥർ പങ്കെടുത്തു. അടുത്ത അധ്യയന വർഷം  പുതിയ യൂണിഫോം നിലവിൽ വരും. യൂണിഫോം തയാറാക്കാനുള്ള അപ്പാരൽ യൂണിറ്റ് ജില്ലാ പഞ്ചായത്തിന്റെ ജെൻഡർ പാർക്കിലോ സ്ഥല സൗകര്യമുള്ള ക്ലസ്റ്ററുകളിലോ സ്ഥാപിക്കും. ആദ്യഘട്ടത്തിൽ 50 വനിതകൾക്ക്  ജോലി ലഭിക്കുമെന്നു ജില്ലാ പഞ്ചായത്ത് പ്രസിഡന്റ് കെ.ജി.രാജേശ്വരി പറഞ്ഞു.

Content Highlight: Gender neutral uniform