സിൽവർലൈൻ പദ്ധതി ‘ഇരുണ്ട പാത’; മേധ പട്കർ

കണ്ണൂർ/കാസർകോട് ∙ ജനജീവിതത്തെ ഗുരുതരമായി ബാധിക്കുന്ന സിൽവർലൈൻ പദ്ധതി ‘ഇരുണ്ട പാത’ ആണെന്നു പരിസ്ഥിതി – മനുഷ്യാവകാശ പ്രവർത്തക മേധ പട്കർ. സിൽവർലൈൻ പ്രതിരോധ സമര സംഗമം ഉദ്ഘാടനം ചെയ്യുകയായിരുന്നു അവർ. 

ഈ പദ്ധതിയുമായി ശക്തമായി മുന്നോട്ടു പോകുമെന്നു പറയുന്നവർ നന്ദിഗ്രാമിൽ നിന്ന് ഒന്നും പഠിച്ചിട്ടില്ലെന്നാണു മനസിലാക്കേണ്ടതെന്ന് മേധ പട്കർ കാസർകോട്ട് പറഞ്ഞു. രണ്ടു പ്രളയമുണ്ടായ നാടാണു കേരളം. അപ്പോഴാണ് മതിലുകെട്ടി സിൽവർലൈൻ പദ്ധതി നടപ്പാക്കാൻ ശ്രമിക്കുന്നതെന്നും അവർ കുറ്റപ്പെടുത്തി. സിൽവർലൈൻ പദ്ധതി നടപ്പായാൽ വീടുകൾ നഷ്ടപ്പെടുന്ന മേഖലകളും മേധ സന്ദർശിച്ചു.എൻഡോസൾഫാൻ പുനരധിവാസ വിഷയത്തിൽ പ്രശ്നങ്ങൾക്കു കാരണം കാസര്‍കോട് മുൻ കലക്ടർ സജിത് ബാബുവിന്റെ നിലപാടാണെന്ന് അവർ ആരോപിച്ചു. എൻഡോസൾഫാൻ ദുരിതബാധിതരെയും സന്ദർശിച്ചാണ് അവർ മടങ്ങിയത്.

English Summary: Medha Patkar against Silverline