ജനാധിപത്യത്തിനു കരിദിനം; സജി ചെറിയന്റേത് ‘കളങ്കിത സത്യപ്രതിജ്ഞ’യെന്ന് സുധാകരൻ

തിരുവനന്തപുരം∙ മന്ത്രിസഭയിലേക്കുള്ള സജി ചെറിയാന്റെ മടങ്ങിവരവ് കേരള രാഷ്ട്രീയ ചരിത്രത്തിലെ തീരാക്കളങ്കം ആയിരിക്കുമെന്ന് കെപിസിസി പ്രസിഡന്റ് കെ.സുധാകരൻ എംപി. പിണറായി വിജയൻ എന്ന വ്യക്തിയുടെ താൽപര്യങ്ങൾക്ക് അനുസരിച്ച് പ്രവർത്തിക്കുന്ന ഭക്തജനക്കൂട്ടമായി സിപിഎം മാറി. ഭരണഘടനയെ സജി അവഹേളിച്ചതിനു തെളിവില്ലെന്നു പറഞ്ഞ വെളിവില്ലാത്ത കേരള പൊലീസും ഭരണകൂടവും ഈ നാടിന് അപമാനമാണ്.

അധികാരം ഇല്ലാതെ ഒരു നിമിഷം പോലും ജീവിക്കാൻ ആവില്ല എന്ന നിലയിലേക്ക് സിപിഎം നേതാക്കൾ അധഃപതിച്ചു. ധാർമികതയും മൂല്യവും ഘോരഘോരം കൊട്ടിഘോഷിക്കുന്നവരുടെ തനിനിറം മലയാളികൾ മനസ്സിലാക്കണം. ഭരണഘടനയെ അപമാനിച്ച മന്ത്രിയെ പുറത്താക്കാൻ ഉള്ള സകല നിയമസാധുതകളും പ്രതിപക്ഷം പരിശോധിക്കുകയാണെന്നു സുധാകരൻ പറഞ്ഞു. 

English Summary: K Sudhakaran on return of Saji Cheriyan to State Cabinet