ഓർമിക്കാം ഇക്കാര്യങ്ങൾ

∙ മ്യൂച്വൽ ഫണ്ടുകളുടെ വിവിധ നിക്ഷേപ പദ്ധതികളിൽ അംഗങ്ങളായിട്ടുള്ളവർ 31 നു മുൻപ് അവകാശിയെ നിർദേശിക്കണം. നാമനിർദേശം ചെയ്യാത്തവർക്കു യൂണിറ്റുകളുടെ ക്രയവിക്രയം സാധ്യമാകില്ല.

∙ ഓഹരി നിക്ഷേപകർ ഡീമാറ്റ് അക്കൗണ്ടിൽ നോമിനിയുടെ പേരു നിർദേശിക്കേണ്ട അവസാന ദിനവും 31.

∙ ആദായ നികുതി നിയമത്തിലെ 80 സി വകുപ്പു പ്രകാരമുള്ള ആനുകൂല്യം ലഭിക്കാൻ പിപിഎഫ്, സുകന്യ സമൃദ്ധി യോജന, ഓഹരി അധിഷ്ഠിത സമ്പാദ്യ പദ്ധതി (ഇഎൽഎസ്എസ്) തുടങ്ങിയവയിൽ നിക്ഷേപം നടത്തേണ്ട അവസാന തീയതി 31.

∙ ഇൻഷുറൻസ് / പെൻഷൻ പദ്ധതിയായ പ്രധാൻമന്ത്രി വയ വന്ദന യോജനയിൽ 15 ലക്ഷം രൂപ വരെ നിക്ഷേപിക്കാം. മുതിർന്ന പൗരന്മാർക്കു സ്ഥിരവരുമാനം വാഗ്ദാനം ചെയ്യുന്ന പദ്ധതിയുടെ നിലവിലെ പലിശ നിരക്ക് 7.40 ശതമാനമാണ്. അവസാനദിനം 31.

∙ 5 ലക്ഷം രൂപയിൽ കൂടുതൽ തുകയുടെ ഹൈ പ്രീമിയം ലൈഫ് ഇൻഷുറൻസ് പോളിസിയിന്മേൽ ആദായ നികുതി ഇളവു ലഭിക്കണമെങ്കിൽ 31നു മുമ്പു പോളിസി വാങ്ങിയിരിക്കണം.

∙ 2019 – 2020 ലെ ആദായത്തിന്റെ അടിസ്ഥാനത്തിലുള്ള പരിഷ്കരിച്ച റിട്ടേൺ നിബന്ധനകൾക്കു വിധേയമായി 31 വരെ സ്വീകരിക്കും. റിട്ടേൺ നൽകാതിരുന്നവർക്കും ഏതെങ്കിലും വരുമാനം റിപ്പോർട്ട് ചെയ്യാൻ വിട്ടുപോയവർക്കുമാണ് അവസരം.

∙ നികുതി വിധേയമായ പരിധിയിൽ താഴെ മാത്രമാണു നടപ്പു സാമ്പത്തിക വർഷത്തെ പലിശ വരുമാനമെങ്കിൽ സ്രോതസിൽനിന്നു നികുതി കിഴിവു ചെയ്യരുതെന്നു ബാങ്കിനോട് അഭ്യർഥിക്കാം. ഫോം 15 ജി / 15 എച്ച് സമർപ്പിക്കുകയാണു വേണ്ടത്.

∙ റജിസ്റ്റർ ചെയ്തിട്ടുള്ള നികുതിദായകർ ഐജിഎസ്ടി അടയ്ക്കാതെയുള്ള കയറ്റുമതിക്കു ജിഎസ്ടി പോർട്ടലിൽ ജിഎസ്ടി ആർഎഫ്ഡി – 11 ഫോമിൽ ലെറ്റർ ഓഫ് അണ്ടർടേക്കിങ് (എൽയുടി) സമർപ്പിക്കണം. എൽയുടിയുടെ സാധുത 31 വരെ മാത്രം.

∙ ജിഎസ്ടി നിയമ പ്രകാരം അർഹരായവർക്കു കോമ്പോസിഷൻ സ്കീം തിരഞ്ഞെടുക്കാൻ 31 വരെ മാത്രമാണ് അർഹത.

English Summary: Changes from April 1