സുരേഷ് ഗോപി പങ്കെടുത്ത പരിപാടിക്കിടെ സ്വയം തീകൊളുത്താൻ ശ്രമിച്ച് യുവാവ്
Mail This Article
തൃശൂർ ∙ സുരേഷ് ഗോപി പങ്കെടുത്ത പരിപാടിക്കിടയിലേക്കു തള്ളിക്കയറിയ ശേഷം സ്വയം തീകൊളുത്താൻ യുവാവിന്റെ ശ്രമം. ദേഹത്തു മണ്ണെണ്ണയൊഴിച്ച ശേഷം തളിക്കുളം സ്വദേശി സുരേഷ് (43) ആണു ജീവനൊടുക്കാൻ ശ്രമിച്ചത്. സുരേഷ് ഗോപി പങ്കെടുത്ത ‘എസ്ജി കോഫി ടൈം’ എന്ന സംവാദ പരിപാടി ഇന്നലെ രാവിലെ 10.30ഓടെ കൂർക്കഞ്ചേരിയിൽ നടക്കുന്നതിനിടെയാണു സംഭവം.
പരിപാടിക്കൊടുവിൽ സുരേഷ് ഗോപി പുറത്തേക്കു പോകുന്നതിനിടെ സുരേഷ് ദേഹമാസകലം മണ്ണെണ്ണയൊഴിച്ചു ലൈറ്ററുമായി തള്ളിക്കയറുകയായിരുന്നു. സമീപത്തുണ്ടായിരുന്ന ബിജെപി പ്രവർത്തകർ ലൈറ്റർ തട്ടിത്തെറിപ്പിക്കുകയും ഇയാളെ പിടികൂടി പുറത്തേക്കു മാറ്റുകയും ചെയ്തു.
പരിപാടി നടക്കുന്ന സോമിൽ റോഡിലെ കെട്ടിടം താൻ നിർമിച്ചതാണെന്നും ഇതുമായി ബന്ധപ്പെട്ട കടബാധ്യതയാണു ജീവനൊടുക്കാൻ ശ്രമിച്ചതിനു കാരണമെന്നും ഇയാൾ പൊലീസിനോടു പറഞ്ഞു. മുൻപു ഹോട്ടൽ നടത്തിയിരുന്ന ഇയാൾ കടുത്ത സാമ്പത്തിക പ്രതിസന്ധിയിലാണെന്നു പൊലീസ് പറഞ്ഞു.