ഗണേഷ് മന്ത്രി ആകുന്നതിൽ സന്തോഷം: സുകുമാരൻ നായർ

ചങ്ങനാശേരി ∙ നിയുക്ത മന്ത്രി കെ.ബി.ഗണേഷ്കുമാർ പെരുന്ന എൻഎസ്എസ് ആസ്ഥാനത്തെത്തി. ഇന്നലെ വൈകിട്ട് 6.30ന് എത്തിയ അദ്ദേഹം എൻഎസ്എസ് ജനറൽ സെക്രട്ടറി ജി.സുകുമാരൻനായർക്കൊപ്പം മന്നം സമാധിയിൽ പുഷ്പാർച്ചന നടത്തി. ഗണേഷ്കുമാറിനു മന്ത്രിസ്ഥാനം ലഭിക്കുന്നതിൽ സന്തോഷമുണ്ടെന്നും മന്ത്രിസ്ഥാനം സർക്കാരിനും എൻഎസ്എസിനും ഇടയിലെ പാലമായി കാണേണ്ടതില്ലെന്നും സുകുമാരൻനായർ പറഞ്ഞു. സുകുമാരൻ നായർ തനിക്കു പിതൃസ്ഥാനീയനാണെന്നും കുറെക്കാലമായി തനിക്കു വഴികാട്ടുന്നയാളാണെന്നും ഗണേഷ് പറഞ്ഞു. എൻഎസ്എസ് ബോർഡ് ഓഫ് ഡയറക്ടേഴ്സ് അംഗവും പത്തനാപുരം താലൂക്ക് യൂണിയൻ പ്രസിഡന്റുമാണു ഗണേഷ്.