സ്റ്റേഷനിൽ നിന്നു മണ്ണുമാന്തി കടത്തിയ എസ്ഐ അറസ്റ്റിൽ

മുക്കം (കോഴിക്കോട്)∙ വാഹനാപകടത്തിൽ കസ്റ്റഡിയിലെടുത്ത മണ്ണുമാന്തി യന്ത്രം പൊലീസ് സ്റ്റേഷൻ കോംപൗണ്ടിൽ നിന്നു കടത്തി പകരം മറ്റൊന്ന് എത്തിച്ച സംഭവത്തിൽ സസ്പെൻഷനിലായിരുന്ന മുക്കം എസ്ഐ: ടി.ടി.നൗഷാദ് അറസ്റ്റിൽ.   കസ്റ്റഡിയിലെടുത്ത യന്ത്രത്തിന് ഇൻഷുറൻസ് ഇല്ലാതിരുന്നതിനെ തുടർന്നാണ് ഉടമയുടെ നേതൃത്വത്തിൽ മാറ്റിയത്. ബൈക്കുമായി കൂട്ടിയിടിച്ചുണ്ടായ അപകടത്തെ തുടർന്ന് സെപ്റ്റംബർ 19ന് തോട്ടുമുക്കം സ്വദേശി സുധീഷ്  മരിച്ച സംഭവത്തിലാണ് മണ്ണുമാന്തി കസ്റ്റഡിയിലെടുത്തത്. യന്ത്രം ഉടമയുടെ മകൻ ഉൾപ്പെടെ 6 പേരെ പൊലീസ് പിടികൂടിയിരുന്നു. എസ്ഐയുടെ പങ്കിനെ കുറിച്ച് സൂചന ലഭിച്ചതിനെ തുടർന്ന് അന്വേഷണം റൂറൽ ജില്ലാ ക്രൈംബ്രാഞ്ച് ഡിവൈഎസ്പി: പി.പ്രമോദ് ഏറ്റെടുത്തു. എസ്ഐക്കെതിരെ കോടതിയിൽ റിപ്പോർട്ട് സമർപ്പിച്ചതിനെ  തുടർന്നാണ് അറസ്റ്റ് രേഖപ്പെടുത്തിയത്.