കരാറുകാരനെ പിരിച്ചുവിട്ടപ്പോൾ ചിലർക്കു പൊള്ളി: മന്ത്രി റിയാസ്; കടകംപള്ളിക്ക് പരോക്ഷ മറുപടി

നേമം (തിരുവനന്തപുരം) ∙ സ്മാർട് സിറ്റി പദ്ധതി നടത്തിപ്പിൽ വീഴ്ച വരുത്തിയ കരാറുകാരനെ പിരിച്ചുവിട്ടതിൽ ചിലർക്കു പൊള്ളിയിട്ടുണ്ടെന്ന് മന്ത്രി മുഹമ്മദ് റിയാസ്. അവരുടെ ദേഹത്തെ ആ പൊള്ളൽ ഇതുവരെ ഉണങ്ങിയിട്ടില്ല. അതാണ് ചില ഭാഗത്തുനിന്നു വാർത്തകളും അഭിപ്രായങ്ങളും ഉയർന്നതെന്നും മന്ത്രി പറ‍ഞ്ഞു. സ്മാർട് റോഡ് വികസനത്തിന്റെ പേരിൽ ജനങ്ങളെ തടങ്കലിലാക്കുന്നുവെന്ന് കോർപറേഷൻ വികസന സമിതി യോഗത്തിൽ മുൻ മന്ത്രിയും എംഎൽഎയുമായ കടകംപള്ളി സുരേന്ദ്രൻ വിമർശിച്ചിരുന്നു. ഇതിനു പരോക്ഷമായ മറുപടിയാണ് മന്ത്രിയുടേത്. മൂന്നും നാലും വർഷമായി നഗരത്തിലെ റോഡ് വെട്ടിപ്പൊളിച്ചിട്ടിരിക്കുന്നതിനെ മേയർ ആര്യ രാജേന്ദ്രനെ വേദിയിലിരുത്തിയാണ് കടകംപള്ളി വിമർശിച്ചത്.