തീരുമാനമായി: ഒന്ന്, രണ്ട് ക്ലാസുകളിൽ വച്ച് തന്നെ വിദ്യാർഥികൾക്ക് അക്ഷരം തിരിച്ചറിയാൻ പ്രാവീണ്യം ലഭിക്കണം

തിരുവനന്തപുരം ∙ വിദ്യാർഥികൾക്ക് ഒന്നും രണ്ടും ക്ലാസുകളിൽ വച്ചു തന്നെ അക്ഷരങ്ങൾ തിരിച്ചറിയാനും എഴുതാനുമുള്ള പ്രാവീണ്യം ലഭിക്കുന്ന രീതിയിലുള്ള പഠനരീതി നടപ്പാക്കണമെന്ന് വിദ്യാഭ്യാസ മേഖലയിലെ ഉദ്യോഗസ്ഥരുമായി ഭാഷാ മാർഗനിർദേശക വിദഗ്ധ സമിതി നടത്തിയ ചർച്ചയിൽ തീരുമാനമായി.

വാക്കുകളും വാചകങ്ങളും തെറ്റുകൂടാതെ വായിക്കാനും എഴുതാനുമുള്ള ശേഷി പ്രൈമറി ക്ലാസുകളിൽ പഠിക്കുമ്പോൾ തന്നെ വിദ്യാർഥികളിൽ വളർത്തിയെടുക്കണം. എസ്‌‍സിഇആർടിക്കാണ് ഇക്കാര്യങ്ങൾ നടപ്പാക്കുന്നതിന്റെ ചുമതല. മലയാള പഠനം രസകരമാക്കാനും കുട്ടികൾക്കു ഭാഷയിൽ താൽപര്യം വർധിപ്പിക്കുന്നതിനും ഭാഷയുടെ താളബോധം തിരിച്ചറിയുന്നതിനും സാധിക്കുന്ന കവിതകൾ കണ്ടെത്തി അവ ഹൃദിസ്ഥമാക്കാൻ പ്രോത്സാഹിപ്പിക്കണം. കഥകളിലൂടെയും ഉപന്യാസങ്ങളിലൂടെയും ഭാഷാ മികവും പഠന താൽപര്യവും കൂട്ടണം. എസ്‍സിഇആർടി പാഠപുസ്തകങ്ങളുടെ പ്രൂഫ് വായിക്കുന്നവർക്ക് മലയാളത്തിന്റെ എഴുത്തുരീതി സംബന്ധിച്ചു പരിശീലനം നൽകണമെന്നും ഇതിനായി വിദഗ്ധ സമിതി അംഗങ്ങളുടെ സേവനം പ്രയോജനപ്പെടുത്താമെന്നും യോഗം തീരുമാനിച്ചു. സമിതി ചെയർമാൻ ഡോ. വി.പി.ജോയ് ആധ്യക്ഷ്യം വഹിച്ചു.