സമാന്തര എക്സ്ചേഞ്ച് കേസുകൾ എൻഐഎക്ക്; 14 സ്റ്റേഷനുകളിൽ റജിസ്റ്റർ ചെയ്ത 20 കേസുകൾ ഏൽപിച്ച് വിജ്ഞാപനം

തിരുവനന്തപുരം ∙ സംസ്ഥാനത്തു നാലു വർഷത്തിനിടെ റജിസ്റ്റർ ചെയ്ത മുഴുവൻ സമാന്തര ടെലിഫോൺ എക്സ്ചേഞ്ച് കേസുകളും ദേശീയ അന്വേഷണ ഏജൻസിക്കു (എൻഐഎ) കൈമാറി. 7 പൊലീസ് ജില്ലകളിലെ 14 സ്റ്റേഷനുകളിൽ റജിസ്റ്റർ ചെയ്ത 20 കേസുകൾ എൻഐഎയെ ഏൽപിച്ചു സർക്കാർ വിജ്ഞാപനമിറക്കി.

നിയമപരമായ ഏജൻസികളുടെ കണ്ണുവെട്ടിച്ച് വിദേശരാജ്യങ്ങളിലുള്ളവരുമായി ആശയവിനിമയം നടത്താനാണു സമാന്തര ടെലിഫോൺ എക്സ്ചേഞ്ചുകൾ പ്രവർത്തിപ്പിക്കുന്നത്. രാജ്യവിരുദ്ധ പ്രവർത്തനങ്ങൾ വരെ നടന്നേക്കാവുന്ന ഈ സംഭവങ്ങളിൽ ദേശീയ അന്വേഷണ ഏജൻസി നേരത്തെതന്നെ അന്വേഷണം തുടങ്ങിയിരുന്നു.

ഡൽഹി സ്പെഷൽ പൊലീസ് എസ്റ്റാബ്ലിഷ്മെന്റ് നിയമപ്രകാരമാണ് എൻഐഎ കേസ് അന്വേഷിക്കുന്നത്. സംസ്ഥാന പൊലീസ് റജിസ്റ്റർ ചെയ്യുന്ന കേസുകളിൽ ഈ നിയമം അനുസരിച്ച് സംസ്ഥാന സർക്കാരിന്റെ സമ്മതം ആവശ്യമാണ്. ഇതിനു വേണ്ടിയാണു സർക്കാർ വിജ്ഞാപനമിറക്കിയത്.

കേസുകൾ ഈ സ്റ്റേഷനുകളിൽ

കോഴിക്കോട് കസബ (5), മലപ്പുറം സൈബർ ക്രൈം, പെരിന്തൽമണ്ണ (2 വീതം), എറണാകുളം സെൻട്രൽ, തൃക്കാക്കര, കൊരട്ടി, പാലക്കാട് നോർത്ത്, കൊപ്പം, മഞ്ചേരി, തിരൂരങ്ങാടി, കൊളത്തൂർ, കണ്ണൂർ മുഴക്കുന്ന്, കാസർകോട് അമ്പലത്തറ (1 വീതം).