കനത്ത ചൂട് തുടരുന്നു; ഏപ്രിൽ ഒന്നുവരെ പത്തു ജില്ലയിൽ യെലോ അലർട്ട്

തിരുവനന്തപുരം∙ കനത്ത ചൂട് തുടരുന്നു. ഇന്നലെ സംസ്ഥാനത്തെ മിക്ക കേന്ദ്രങ്ങളിലും 36 ഡിഗ്രിക്കു മുകളിലായിരുന്നു താപനില. പുനലൂരിലാണ് ഏറ്റവും കൂടുതൽ (39.5 ). തൃശൂർ വെള്ളാനിക്കര (39), പാലക്കാട് (38.4) എന്നിങ്ങനെയാണു കണക്ക്. തിരുവനന്തപുരവും കൊച്ചിയും കോഴിക്കോടും ഉൾപ്പെടെ മിക്ക സ്റ്റേഷനുകളിലും കുറഞ്ഞ താപനില 27 ഡിഗ്രിക്കു മുകളിലാണ്.

രാത്രിയിലും വിയർത്തു കുളിക്കുന്ന സ്ഥിതി. ഞായറാഴ്ച മുതൽ രണ്ടോ മൂന്നോ ദിവസത്തേക്ക് മധ്യ–തെക്കൻ ജില്ലകളിൽ ചെറിയ തോതിൽ വേനൽ മഴ ലഭിച്ചേക്കും. ചൂടു തുടരുന്നതിനാൽ ഇന്നു മുതൽ ഏപ്രിൽ ഒന്നു വരെ 10 ജില്ലകളിൽ യെലോ അലർട്ട് പ്രഖ്യാപിച്ചു. കൊല്ലം, തൃശൂർ, പാലക്കാട്, പത്തനംതിട്ട, കോട്ടയം, ആലപ്പുഴ, എറണാകുളം, കോഴിക്കോട്, കണ്ണൂർ, തിരുവനന്തപുരം ജില്ലകളിലാണിത്. കേരള, കർണാടക, ലക്ഷദ്വീപ് തീരങ്ങളിൽ മീൻപിടിത്തത്തിനു തടസ്സമില്ല.