അവരുണ്ട് ഇത്തവണയും; പലയിടത്തും അപരവിളയാട്ടം
Mail This Article
കണ്ണൂർ ∙ ഇരുമുന്നണി സ്ഥാനാർഥികൾക്കും ലക്ഷണമൊത്ത അപരർ രംഗത്തുണ്ട്. എൽഡിഎഫ് സ്ഥാനാർഥി എം.വി.ജയരാജന്റെ അപരനായി മറ്റൊരു എം.വി.ജയരാജൻ. പുറമേ മറ്റു 2 ജയരാജന്മാരും. പാലക്കാട് ഒറ്റപ്പാലം സ്വദേശിയായ ഏർക്കാട് പറമ്പ് ജയരാജും പാലക്കാട് വാണിയംകുളം മണിശ്ശേരിയിലെ പനഞ്ചിക്കൽ ജയരാജുമാണു പത്രിക നൽകിയത്. പേരിനൊപ്പം ഇനിഷ്യൽ ചേർത്താൽ ഇവർ ഇ.പി.ജയരാജും പി.ജയരാജുമായി മാറും. യുഡിഎഫ് സ്ഥാനാർഥി കെ.സുധാകരന്റെ അപരരായി മറ്റു 2 കെ.സുധാകരന്മാർ രംഗത്തുണ്ട്.
വടകര: എൽഡിഎഫ് സ്ഥാനാർഥി കെ.കെ.ശൈലജയ്ക്ക് 3 അപരർ. കെ.ശൈലജ, കെ.കെ.ശൈലജ, പി. ശൈലജ എന്നിവർ പത്രിക നൽകി. യുഡിഎഫ് സ്ഥാനാർഥി ഷാഫി പറമ്പിലിനെതിരെ ഷാഫി, ടി.പി.ഷാഫി എന്നിവരും പത്രിക നൽകി.
കോഴിക്കോട്: ഇടതു സ്ഥാനാർഥി എളമരം കരീമിനും 3 അപരരുണ്ട്–അബ്ദുൽ കരീം, അബ്ദുൽ കരീം, അബ്ദുൽ കരീം. യുഡിഎഫ് സ്ഥാനാർഥി എം.കെ.രാഘവന് 3 അപരർ–എൻ.രാഘവൻ, ടി.രാഘവൻ, പി.രാഘവൻ
പാലക്കാട്: ഇടതു സ്ഥാനാർഥി എ.വിജയരാഘവന് എതിരെ ശ്രീകൃഷ്ണപുരം സ്വദേശി എ.വിജയരാഘവൻ രംഗത്തുണ്ട്.
ആറ്റിങ്ങൽ: യുഡിഎഫ് സ്ഥാനാർഥി അടൂർ പ്രകാശിന്റെ പേരുമായി സാമ്യമുള്ള ആറ്റിങ്ങൽ കിഴുവിലം അണ്ടൂർ എസ്.പ്രകാശ് പത്രിക നൽകി.
തിരുവനന്തപുരം: യുഡിഎഫ് സ്ഥാനാർഥി ശശി തരൂരിന്റെ പേരുമായി സാമ്യമുള്ള ശശി എന്നയാൾ പത്രിക നൽകി. വിളപ്പിൽശാല സ്വദേശിയാണ്.
കൊല്ലം: യുഡിഎഫ് സ്ഥാനാർഥി എൻ.കെ.പ്രേമചന്ദ്രന്റെ അപരനായി കൊല്ലം പനയം പ്ലാവിള വീട്ടിൽ പ്രേമചന്ദ്രൻ നായർ പത്രിക സമർപ്പിച്ചു.
തൃശൂർ: എൽഡിഎഫ് സ്ഥാനാർഥി വി.എസ്.സുനിൽകുമാറിനെതിരെ അവിണിശ്ശേരി സ്വദേശി സുനിൽകുമാർ പത്രിക നൽകി.
പൊന്നാനി: യുഡിഎഫ് സ്ഥാനാർഥി എം.പി.അബ്ദുസ്സമദ് സമദാനിക്ക് അബ്ദുസ്സമദ് എന്ന പേരിൽ അപരനുണ്ട്. എൽഡിഎഫ് സ്ഥാനാർഥി കെ.എസ്.ഹംസയ്ക്ക് അപരർ രണ്ടാണ്. ഹംസ, ഹംസ കൊടവണ്ടി.
മലപ്പുറം: എൽഡിഎഫ് സ്ഥാനാർഥി വി.വസീഫിന് പേരുമായി സാമ്യമുള്ള 2 പേരുണ്ട്. നസീഫ് അലി മുല്ലപ്പള്ളി, പി.പി.നസ്വീഫ്. എൻഡിഎ സ്ഥാനാർഥി എം.അബ്ദുസ്സലാമിന് എതിരെ അബ്ദുസ്സലാം എന്ന പേരിൽ സ്ഥാനാർഥിയുണ്ട്.
കോട്ടയം : യുഡിഎഫ് സ്ഥാനാർഥി ഫ്രാൻസിസ് ജോർജിന് 2 അപരന്മാർ. കാഞ്ഞിരപ്പള്ളി കൂവപ്പള്ളി കളപുരക്കൽ ഫ്രാൻസിസ് ജോർജും തൃശൂർ അഞ്ചേരി ഇളുവത്തിങ്കൽ ഫ്രാൻസിസ് ഇ.ജോർജുമാണു പത്രിക നൽകിയത്.