ക്യാംപസ് ആഘോഷം : കർശന മാനദണ്ഡം വരുന്നു; അനുമതി, സുരക്ഷാ ഓഡിറ്റ് നിർബന്ധം

കൊച്ചി ∙ സർവകലാശാലകളിലും കോളജുകളിലും ആഘോഷപരിപാടികൾ നടത്തുന്നതിനു സർക്കാർ കർശന നിബന്ധനകൾ ഏർപ്പെടുത്തി. കുസാറ്റിൽ നവംബർ 25ന് ഉണ്ടായ ദുരന്തത്തിൽ 4 വിദ്യാർഥികൾ മരിച്ചതിനെത്തുടർന്ന് അപക‌ട സാധ്യതകൾ ഒഴിവാക്കുന്നതു പഠിക്കാൻ നിയോഗിച്ച കമ്മിറ്റി സമർപ്പിച്ച റിപ്പോർട്ട് അംഗീകരിച്ചാണിത്.

പ്രധാന നിർദേശങ്ങൾ:

∙ ക്യാംപസുകളിൽ സുരക്ഷ ഉറപ്പാക്കുന്നതിനും സൗകര്യങ്ങളുടെ ഓഡിറ്റ് നടത്തുന്നതിനും ഇൻസ്റ്റിറ്റ്യൂഷനൽ റിസ്ക് മാനേജ്മെന്റ് കമ്മിറ്റി (ഐആർഎംസി) രൂപീകരിക്കണം. കമ്മിറ്റി 6 മാസത്തിൽ ഒരിക്കൽ സുരക്ഷാ ഓഡിറ്റ് നടത്തണം. ഇരുന്നൂറോ അതിലേറെയോ പേർ പങ്കെടുക്കുന്ന പരിപാടികൾ ഐആർഎംസിയുടെ അംഗീകാരത്തോടെ മാത്രമേ നടത്താനാവൂ. 

∙ ദുരന്തനിവാരണ പദ്ധതി (ഡിസാസ്റ്റർ മാനേജ്മെന്റ് പ്ലാൻ) തയാറാക്കണം. പ്ലോട്ട് മാപ്പ് ജില്ലാ ദുരന്ത നിവാരണ അതോറിറ്റി, പൊലീസ്, തദ്ദേശസ്ഥാപനങ്ങൾ എന്നിവയ്ക്കു കൈമാറണം.

∙ ആഘോഷ പരിപാടികളുടെ പൊതുമാനദണ്ഡങ്ങൾ വിദ്യാർഥികളെ മുൻകൂട്ടി അറിയിക്കണം. ആൾക്കൂട്ട നിയന്ത്രണം സംബന്ധിച്ചുള്ള അറിയിപ്പുകൾ മുൻകൂട്ടി മാധ്യമങ്ങൾ വഴിയും ഡിസ്പ്ലേ ബോർഡുകൾ വഴിയും നൽകണം. 

∙ അടച്ചിട്ട ഓഡിറ്റോറിയങ്ങളിൽ  പുറത്തേക്ക് ഒന്നിലധികം വഴികൾ ഉണ്ടെന്ന് ഉറപ്പുവരുത്തണം. നീണ്ട ക്യൂ ഒഴിവാക്കണം. ഭിന്നശേഷിക്കാർക്കു പ്രത്യേകം വഴികൾ ഉണ്ടാകണം. പ്രവർത്തനക്ഷമമായ സിസിടിവി ക്യാമറകൾ ഓഡിറ്റോറിയങ്ങളിൽ നിർബന്ധമാണ്. വൈദ്യുതി മുടങ്ങില്ലെന്ന് ഉറപ്പുവരുത്തണം. 

∙ ബാഹ്യ ഏജൻസികളുടെയും പ്രഫഷനൽ ഗ്രൂപ്പുകളുടെയും പ്രോഗ്രാമുകളെക്കുറിച്ചുള്ള വിവരങ്ങൾ 5 പ്രവൃത്തി ദിവസങ്ങൾക്കു മുൻപ് സ്ഥാപന മേധാവിയെ അറിയിച്ച് മുൻകൂർ അനുമതി വാങ്ങണം.