കോണ്‍ഗ്രസില്‍ തുടക്കം, ഒന്നിച്ചും വഴിപിരിഞ്ഞും രാഷ്ട്രീയ യാത്ര

കരിങ്ങോഴക്കൽ മാണി മാണി( കെ.എം മാണി),  കേരള കോൺഗ്രസ് (എം) ചെയർമാൻ, മുൻ ധനമന്ത്രി (86) (1933– 2019)

∙ 1933 ജനുവരി 30. മീനച്ചിൽ താലൂക്കിലെ മരങ്ങാട്ടുപിള്ളിയിൽ കരിങ്ങോഴയ്‌ക്കൽ തൊമ്മൻ മാണിയുടെയും ഏലിയാമ്മയുടെയും മകനായി ജനനം

∙ മരങ്ങാട്ടുപള്ളി സെന്റ് തോമസ്, കടപ്ലാമറ്റം സെന്റ് ആന്റണീസ്, കുറവിലങ്ങാട് സെന്റ് മേരീസ്, പാലാ സെന്റ് തോമസ് എന്നിവിടങ്ങളിൽ പ്രാഥമിക വിദ്യാഭ്യാസം.

∙ സ്‌കൂൾ വിദ്യാർഥിയായിരിക്കേ തിരുവതാം കൂറിൽ പൊട്ടിപ്പുറപ്പെട്ട ഉത്തരവാദഭരണ പ്രക്ഷോഭത്തിൽ പങ്കാളി.
∙ തിരുച്ചിറപ്പിള്ളി സെന്റ് ജോസഫ്‌സ്, തേവര സേക്രഡ് ഹാർട്ട്‌സ് എന്നിവിടങ്ങളിൽ നിന്ന് കോളേജ് വിദ്യാഭ്യാസം.

∙ 1955 ൽ മദ്രാസ് ലോ കോളജിൽനിന്ന് നിയമ ബിരുദം.

∙ 1957 നംവബർ 28 നു കേരളത്തിലെ ആദ്യത്തെ പ്രതിപക്ഷനേതാവ് പി.ടി ചാക്കോയുടെ ബന്ധു കുട്ടിയമ്മയെ വിവാഹം കഴിച്ചു.
∙ 1959 രാഷ്ട്രീയത്തിൽ സജീവമാകുന്നു. 1959 മുതൽ കെപിസിസി അംഗം.
∙ 1963 ൽ ആഭ്യന്തര മന്ത്രിയായിരുന്ന പി.ടി ചാക്കോയുടെ കാർ അപകടത്തിൽപ്പെടുന്നു. അതിൽ ഒരു സ്ത്രീയുണ്ടായിരുന്നുവെന്ന പ്രചാരണത്തെ തുടർന്നു രാഷ്ട്രീയ വിവാദം.

∙ 1964 കോട്ടയം ഡിസിസി സെക്രട്ടറിയായി നിയമിതനാകുന്നു.
∙ 1964 പി.ടി ചാക്കോയുടെ മരണം.
∙ 1964 കെ.എം. ജോർജിന്റെ നേതൃത്വത്തിൽ 15 എംഎൽഎമാർ കോൺഗ്രസ് വിടുന്നു.ആർ. ശങ്കർ സർക്കാരിനുള്ള പിന്തുണ പിൻവലിച്ചു കേരളാ കോൺഗ്രസ് എന്ന പുതിയ രാഷ്ട്രീയ കക്ഷിയായി രൂപം കൊളളുന്നു.

∙ 1964 കെ എം ജോർജ്, ആർ ബാലകൃഷ്ണപിള്ള എന്നിവരുടെ നേതൃത്വത്തിൽ തിരുനക്കരയിലെ സമ്മേളനത്തിൽ കേരള കോൺഗ്രസ് പിറക്കുന്നു.
∙ 1964 തിരുനക്കരയിൽ മന്നത്തു പത്മനാഭൻ കേരള കോൺഗ്രസിനു തിരിതെളിച്ചു.
∙ 1965 കേരള കോൺഗ്രസ്, കെ. എം മാണി, പാലാ എന്ന പേരിലുളള നിയോജകമണ്ഡലത്തിന്റെയും ആദ്യ തിരഞ്ഞെടുപ്പ്.
∙ 1972 കേരള കോൺഗ്രസിൽ പിളർപ്പ്. സ്ഥാപക ജനറൽ സെക്രട്ടറിമാരായ മാത്തച്ചൻ കുരുവിനാൽക്കുന്നേൽ, ആർ ബാലകൃഷ‌്ണപിള്ള എന്നിവർ പുറത്തേക്ക്.
∙ 1975ഡിസംബർ 26. ആദ്യമായി മന്ത്രി സഭയിൽ. 1975 ഡിസംബർ 26 മുതൽ 1977 മാർച്ച് 25 വരെ രണ്ടാം സി. അച്യുതമേനോൻ മന്ത്രിസഭയിൽ ധനമന്ത്രി.
∙ 1976 ൽ കെ എം ജോർജുമായുളള അഭിപ്രായ വ്യത്യാസങ്ങൾ. ചെയർമാനും മന്ത്രിയും ഒരാളാകേണ്ട എന്ന വാദം.

∙ 1976 ഡിസംബർ 11 നു കേരള കോൺഗ്രസ് സ്ഥാപക നേതാവ് കെ. എം ജോർജിന്റെ മരണം.
∙ 1977 ഡിസംബർ 21 ന് തിരഞ്ഞെടുപ്പു കേസിനെ തുടർന്ന‌് എ കെ ആന്റണി മന്ത്രിസഭയിൽ നിന്നും ആഭ്യന്തര മന്ത്രി സ്ഥാനം രാജി വയ്ക്കുന്നു. പി.ജെ ജോസഫ് പകരക്കാരൻ.
∙ 1978 കേസ് ജയിച്ചു ഒന്നാം എ.കെ.ആന്റണി മന്ത്രിസഭയിൽ മാണി തിരികെയെത്തുന്നു. പി.ജെ ജോസഫ് രാജി വയ്ക്കുന്നു. ചെയര്മ‍ാൻ സ്ഥാനം വേണമന്നു ആവശ്യം. മാണി നിരാകരിക്കുന്നു.
വി.എൽ സെബാസ്റ്റ്യൻ പി.ജെ ജോസഫിനെതിരെ ചെയർമാൻ സ്ഥാനത്തേക്കു മത്സരിക്കുന്നു. പാർട്ടിയിൽ വീണ്ടും പിളർപ്പ്.

∙ 1978 ഒക്‌ടോബർ 29 മുതൽ 1979 വരെ പി.കെ.വാസുദേവൻ നായർ മന്ത്രിസഭയിൽ ആഭ്യന്തര മന്ത്രി
∙ 1979 ൽ കേരള കോൺഗ്രസ് എം എന്ന പാർട്ടിക്കു ജൻമം നൽകുന്നു. പി ജെ ജോസഫ‌് യുഡിഎഫിൽ തന്നെ തുടരുന്നു.
∙ ആർ ബാലകൃഷ്ണപിള്ളയുടെ നേതൃത്വത്തിൽ ഒരു വിഭാഗം സിപിഐ എം നയിക്കുന്ന മുന്നണിയിൽ.
∙ 1980 ആർ.ബാലകൃഷ്ണപിള്ള ചെയർമാനായ കേരള കോൺഗ്രസ് (ബി) രൂപീകരണം.
∙ 1980 ജനുവരി 1980 മുതൽ ഒക്‌ടോബർ 20, 1981 വരെ ഒന്നാം ഇ.കെ.നായനാർ മന്ത്രിസഭയിൽ ആഭ്യന്തര മന്ത്രി.
∙ 1980 എ. കെ ആൻണിയുടെ നേതൃത്വത്തിൽ കോൺഗ്രസിൽ പിളർപ്പ്. ഇടതു പക്ഷത്തോടോപ്പം.
∙ 1982 എ. കെ ആന്റണിയും പിന്നീട് കെ. എം മാണിയും കൂറുമാറുന്നു. ഒന്നാം ഇ.കെ.നായനാർ മന്ത്രിസഭ വീഴുന്നു.

∙ 1982 ഐക്യജനാധിപത്യ മുന്നണിയിൽ.
∙ 1981 ഡിസംബർ 28 മുതൽ 1982 മാർച്ച് 17 വരെ രണ്ടാം കെ.കരുണാകരൻ മന്ത്രിസഭയിൽ ധനകാര്യം, നിയമമന്ത്രി
∙ 1982 മേയ് 24 മുതൽ 1986 മേയ് 15 വരെ ധനകാര്യം, നിയമം
∙ 1985 ജൂൺ 6 മുതൽ 1986 മേയ് 25 വരെ വൈദ്യുതി മന്ത്രി
∙ 1986 16 മേയ് മുതൽ 1987 മാർച്ച് 25 വരെ മൂന്നാം കെ.കരുണാകരൻ മന്ത്രിസഭയിൽ നിയമം, ജലസേചന മന്ത്രി.
∙ 1987 ൽ മാണിയെ വിട്ട് ജോസഫ് കേരള കോൺഗ്രസ് ജോസഫ് ഗ്രൂപ്പായി. ചരൽക്കുന്ന് സമ്മേളനത്തിൽ‘ സത്യത്തിന് ഒരടിക്കുറിപ്പ് ’എന്ന ലഘുലേഖ അവതരിപ്പിക്കുന്നു.
∙ ടി.എം ജേക്കബ് മറുകണ്ടം ചാടി മാണിക്കൊപ്പം.

∙1987 ലെ നിയമസഭ തിരഞ്ഞെടുപ്പിൽ മാണിക്കു നാലും ജോസഫിന് അഞ്ചു എംഎൽഎമാർ മാത്രം.
∙1989 ൽ ലോക്‌സഭ സീറ്റിനെ ചൊല്ലി കലഹം പി.ജെ .ജോസഫും സംഘവും ഇടതു മുന്നണിയിൽ.
∙1991 ജൂൺ 24 മുതൽ മാർച്ച് 1995 വരെ നാലാം കെ.കരുണാകരൻ മന്ത്രിസഭയിൽ റവന്യു, നിയമമന്ത്രി.
∙1993ൽ ടി.എം ജേക്കബും പി എം മാത്യുവും മാണിയുമായി പിണങ്ങി പുതിയ പാർട്ടി രൂപീകരിക്കുന്നു. പിന്നാലെ ബാലകൃഷ്ണപ്പിളളയും വേർപിരിയുന്നു. മൂന്നു കുട്ടരും യുഡിഎഫിൽ തന്നെ തുടരുന്നു.

∙ 1997 ൽ ജോസഫ് വിഭാഗത്തിൽ പൊട്ടിത്തെറി ടി വി എബ്രഹാമിന്റെ നേത്യത്വത്തിൽ സാമന്തരഗ്രൂപ്പ് പിറന്നു. ഇവർ മാണിക്കാപ്പം ചേർന്നു.
∙ 2001 മേയ് 17 മുതൽ 2004 ഓഗസ്റ്റ് 31 വരെ റവന്യു, നിയമമന്ത്രി.
∙ 2003 ൽ വീണ്ടും പിളർപ്പ്. മാണിയുമായി പിണങ്ങി പുറത്തു പോയ പി.സി. തോമസ് പുതിയ പാർട്ടിയുണ്ടാക്കി. ഐ.എഫ്.ഡി.പി എ. മുവാറ്റുപുഴയിൽ നിന്നു ജയിച്ചു ബിജെപി മന്ത്രിസഭയിൽ കേന്ദ്രമന്ത്രി.
∙ 2003 ൽ ജോസഫിൽ നിന്ന് അകന്നു പി.സി ജോർജ് പുതിയ പാർട്ടി രൂപീകരിക്കുന്നു. കേരള കോൺഗ്രസ് സെക്യൂലർ.
∙ 2004 ഓഗസ്റ്റ് 31 മുതൽ 2006 മേയ് 17 വരെ ഒന്നാം ഉമ്മൻ ചാണ്ടി മന്ത്രിസഭയിൽ റവന്യു, നിയമമന്ത്രി.
∙ 2010 ജോസഫ് തന്റെ അനുയായികളുമായി കേരള കോൺഗ്രസ് എമ്മിൽ വീണ്ടും ലയിക്കുന്നു.
∙ 2011 മേയ് 18 മുതൽ രണ്ടാം ഉമ്മൻ ചാണ്ടി മന്ത്രിസഭയിൽ ധനം, നിയമം, ഭവനനിർമാണം വകുപ്പുകൾ

∙2015 ബാർ കോഴ അഴിമതി ആരോപണവും രാജിയും. 2014-ൽ പൂട്ടിയ 418 ബാറുകൾ തുറക്കുന്നതിനായി ബാറുടമകളുടെ സംഘടന ഒരു കോടി രൂപ കൈക്കൂലി കൊടുത്തുവെന്ന് ബിജു രമേശ് ആരോപണമുന്നയിച്ചതിനെ തുടർന്ന് .ബാർ കോഴ കേസിൽ ഇദ്ദേഹത്തെ പ്രതിയാക്കി സംസ്ഥാന വിജിലൻസ് അന്വേഷണം ആരംഭിച്ചിരുന്നു.
∙ 2019 ലോക്‌സഭ സീറ്റു വിഭജനവുമായി ബന്ധപ്പെട്ടു പി.ജെ. ജോസഫുമായി തർക്കം. തോമസ് ചാഴിക്കാടനെ സ്ഥാനാർഥിയാക്കുന്നു. വിമതസ്വരം ഉയർത്തിയ ജോസഫ് യുഡിഎഫിൽ തന്നെ തുടരുന്നു.