2 സ്ലീപ്പർ കംപാർട്ട്മെന്റുകൾ; പാലരുവി എക്സ്പ്രസ് 14 കോച്ചുകളാക്കാൻ അനുമതി

കൊല്ലം ∙ തിരുനെൽവേലി- പാലക്കാട് പാലരുവി എക്സ്പ്രസ് ട്രെയിനിൽ 2 സ്ലീപ്പർ കംപാർട്ട്മെന്റുകൾ സഹിതം 14 കോച്ചുകളായി സർവീസ് നടത്താൻ അനുമതി ലഭിച്ചതായി കൊടിക്കുന്നിൽ സുരേഷ് എംപി അറിയിച്ചു. പാലരുവി എക്സ്പ്രസിൽ കോച്ചുകളുടെ എണ്ണം വെട്ടിക്കുറച്ചതു സംബന്ധിച്ച ‘മനോരമ ഓൺലൈൻ’ വാർത്തയെ തുടർന്നാണു നടപടി.

വാർത്തയുടെ അടിസ്ഥാനത്തിൽ ദക്ഷിണ റെയിൽവേ ജനറൽ മാനേജർ, ചീഫ് ഓപ്പറേറ്റിങ് മാനേജർ എന്നിവരുമായി ചർച്ച നടത്തിയതിനെ തുടർന്നാണ് 16791, 16792 നമ്പർ പാലരുവി എക്സ്പ്രസ് ദിനം പ്രതി 14 കോച്ചുകളുള്ള ട്രെയിനായി ഓടിക്കാൻ ദക്ഷിണ റെയിൽവേയുടെ ഭാഗത്ത് നിന്നു നടപടിയുണ്ടായതെന്നും കൊടിക്കുന്നിൽ സുരേഷ് പറഞ്ഞു.