ജോസഫിന്റെ സാന്നിധ്യം നിര്‍ണായകമെന്ന് റോഷി; യുഡിഎഫ് യോഗത്തിനെത്തുമെന്ന് ജോസഫ്

പാലാ ∙ യുഡിഎഫിന്റെ കെട്ടുറപ്പിനും പാലാ ഉപതിരഞ്ഞെടുപ്പിലെ ജയത്തിനും പി. ജെ. ജോസഫിന്റെ സാന്നിധ്യം നിര്‍ണായകമെന്ന് റോഷി അഗസ്റ്റിന്‍ എംഎല്‍എ. ജോസഫ് എത്തിയാല്‍ ഭിന്നത പരിഹരിച്ചു മുന്നോട്ടു പോകാന്‍ വഴിതെളിയുമെന്നും റോഷി അഗസ്റ്റിന്‍ പാലായില്‍ പറഞ്ഞു.

അതേസമയം, നാളെ പാലായില്‍ നടക്കുന്ന യുഡിഎഫ് നേതൃയോഗത്തിനെത്തുമെന്ന് കേരള കോൺഗ്രസ് (എം) വർക്കിങ് ചെയർമാൻ പി.ജെ. ജോസഫ് അറിയിച്ചു. അനുകൂല സാഹചര്യമായതുകൊണ്ടാണ് പങ്കെടുക്കുന്നത്. ഉമ്മന്‍ ചാണ്ടി അടക്കമുളളവര്‍ യോഗത്തിനെത്തുന്നുണ്ടെന്നും ജോസഫ് പറഞ്ഞു. പാലായിൽ എൽഡിഎഫ് സ്ഥാനാർഥി മാണി സി. കാപ്പനു ജയസാധ്യതയുണ്ടെന്ന വെളളാപ്പളളി നടേശന്റെ പ്രസ്താവനയോട് പ്രതികരിക്കാന്‍ പി.ജെ. ജോസഫ് തയാറായില്ല.